Imphal, Iaiong 24: Hadien ka jingshah wiang ding jong ki katto katne tylli ki iing briew ha ki ar tylli ki shnong ha Gampal bad ha Haiyang kiba hap hapoh ka Kamjong District jong ka jylla Manipur ha ki riew runar ki bym lah ban ithuh satia, ki bor pyniaid District kila pynjari noh da ka curfew ba khlem buh por.
Kane ka jingthom bor kala jia ha ka por kumba 9 baje mynstep, kane kala pynlong ia ki bor pyniaid district ban pynjari noh da ka curfew ha baroh ar tylli ki shnong kiba hap hapoh ka Sahamphung Sub-Division, naduh ka por 2 noh phai sngi jong ka sngi Balang.
Katkum ka order kaba la pynmih da ophis ka Kamjong District Magistrate Rangnamei lyngba u Rang Peter, u la ong ba kane ka jingshah wiang ding kala jia ha ka por ba ki paidbah nong shong shnong ki dang leit sha ki jaka rep sha ki lyngkha bad lyngba kane ka jingjia ka lah ban kath ia ka shongsuk shong sain ha kane ka dong ka thain.
Halor kane, u District Magistrate u la pynbna ba hapoh ka Sub-Section 1 jong ka Section 163 hapoh ka Bharatiya Nagarik Suraksha Sanhita (BNSS), 2023, la khang pyrshah ia ki briew ba kin leit kin wan bad ban mih na la iing bad kumjuh ruh la khang pyrshah ruh ia kino kino ki jait kam kiba lah ban ktah ia ka shong suk shong sain.
“Kum kine ki jait jingjia ki lah ban lam sha u pud ka ban ktah ia ka shongsuk shong sain bad ka ban buh ha ka jingma ia ki paidbah bad ia ka jingim briew bad ban duhnong ia ka jingdon jingem jong ki briew” ong ka order.
Kane ka curfew kan trei kam beit tad haduh ban da pynbna da kumwei pat, lait noh tang na ka bynta ki jingshakri sorkar kiba donkam. Kino kino ki jingialang ne jingialum paidbah ba don ka jingiathoh ne ka jingleit ontep ki donkam ban da ioh jingbit na ki bor pyniaid district ne na u superintendent of police.
Ia u Hungyo Yurreikan, uba dei u SDC/Sahamphung, u la shah thung kum u Executive Magistrate na ka bynta kine ki ar shnong ban peit khmih ia ka jinglong jingman.
