Imphal, Jymmang 04 : Ka Sorkar kala phah mynta da ki shipai Indian Army bad ka Assam Rifle ha Manipur ban tehlakam ia ka jingkulmar kala mih na ka jingiakhih ki paid riewlum ka Jylla ban pyrshah ia ka jingdawa ka Jaidbynriew Meitei ban ai jingithuh kum ki Scheduled Tribe ka Jylla.
Palat 8000 ngut ki briew na ki jaidbynriew bapher bapher la pynkynriah da ki shipai sha ki jaka ba shngain namar ka jingnang jur ka huri hura hajan baroh ki 10 tylli ki District ka Jylla Manipur.
U Myntri kam Pohiing ka Ri Amit Shah ula kren ia u Myntri Rangbah ka Jylla N Biren Singh lyngba ka phone bad iasyllok halor ka jinglong jingman ka suk ka sain hapoh ka Jylla.
U Biren Singh ula kyntu ia ki paidbah ba kin bat ia ka jingsuk bad jingjai jai bad ban iatreilang bad ka Sorkar Jylla.
Ha ka khubor lyngba ka video, u Biren Singh ula ong “Ka jingjia ba jia hynnin ka sngi Balang ka dei namar ka jingiasngewthuh bakla hapdeng ki Jaidbynriew. Ka Sorkar kan sa pynbeit ia ki jingdawa bad ki jingud jingnam baroh hadien ba kala iashong syllok bad baroh ki Jaidbynriew lem bad ki Nongialam”.
Ka jinglong jingman ha Manipur kala nang jur hadien ka jingmih jong ki hajar ngut ki paid riewlum ka Jylla hynnin ka sngi ban iashimbynta ha ka “Tribal Solidarity March” bala khot da ka All Tribal Students Union of Manipur (ATSUM) ha baroh ki 10 tylli ki District ka Jylla ban pyrshah ia ka jingdawa jong ka Jaidbynriew Meitei.
Ka huri hura kala mih ha ka shnong Churachandpur, Senapati, Chandel, Kangpokpi bad Tengnaupal District haduh ba ki Pulit kila hap ban siat ia bun tylli ki kuli lyer pynsat khmat ban tem ia ka jinglong jingman.
Na ki video bala saphriang la iohi ia bun tylli ki iing kila shah wiang ding bad bun ngut ki briew kila mynsaw. Ha kajuh ka por, la iohi ruh ia ka jingiashimbynta ki briew kiba kieng atiar ha kane ka huri hura, kaba la nang aiding. La iohi ruh ba ki nongiakhih kila kawang drude bomb sha ki Iing badki nongkynti jong ki briew. Kawei ka dukan suloi kala shah lute ha Churachandpur ha ki runar, kila rong tuh ia bun tylli ki suloi bad da ki hajar tylli ki kuli.
Lah ban kdew hangne ba ka Sorkar Manipur kala khang ia ka jingtreikam jong ka kor Internet haduh 5 sngi hapoh ka Jylla ban tehlakam ia ka jingsaphriang ki khubor hamsaia kiba lah ban nang pynheh shuh shuh ia ka huri hura.
Na ki khubor ba ioh lum, kane ka huri hura kala poi ruh sha ki katto katne ki jaka jong ka Imphal.
