Imphal, Jymmang 08 : U Myntri Rangbah ka Jylla N Biren Singh hynne ka sngi Nyngkong, ula pynbna ia ka song jingiarap ba mat T. 5 lak ia kito kiba iap ha ka jingiaumsnam pher Jaidbynriew.
Haba kren sha ki lad pathai khubor ha Imphal, u Biren Singh ula ong “Ka Sorkar kala rai ban ai mar T. 2 lak sha kito kiba mynsaw jur katba T. 25000 sha kito kiba mynsaw malu mala”.
“Ka pisa ba mar T. 2 lak yn sa sha kito ki Longiing kiba shah thang noh ki iing ki sem. Ka Sorkar Manipur kan sa pyntei biang ia ki Iing kiba la shah wiang ding” ula ong.
U Myntri Rangbah ula pyntip ba ki don haduh 60 ngut ki briew kiba la iap na kane ka jingiaumsnam pher jaidbynriew.
U pyntip ruh ba haduh 1041 tylli ki tiar siat la knieh da ki riew runar. “Tang 214 tylli la ioh ban kurup biang na ki 1041 tylli kiba la tuh da ki riew runar ha kapor ba kulmar” ong u Biren Singh.
Nalor kane, ula pynbna ruh ba ka Sorkar Jylla kan sa pynlong ia ka jingtohkit ha ka kyrdan kaba heh bha halor kane ka jingiaumsnam. Ula pyntip ba haduh 230 ngut ki briew kila mynsaw bad haduh 35000 ngut kila kylla phet wir.
U Biren Singh u pyntip ba haduh 20000 ngut ki briew kila wanphai biang shala ki jong ki Iing katba 15000 ngut ki dang don ha ki jaka rieh tngen ba shipor jong ki shipai.
“Ka jingpyrshang ka dang iai bteng ban pynwan phai noh ia baroh kiba phetwir shala iing kynthup ka jingai pahara sha ki kad liengsuin ia kito kiba donkam ban bat liengsuin ban leit shabar” ong u Myntri Rangbah.
Ka Iingkashari Supreme Court hynne ka sngi Nyngkong, kala bthah ia ka Sorkar Pdeng bad ka Sorkar Manipur ban shim ia ki sienjam kiba donkam ha kaban pynkhlain ia ka bor pahara bad ka jingai jingiarap ia kito kiba shah ktah na ka jingmih ka jingkulmar bad jingiaumsnam ha kane ka Jylla ka thain Shatei Lam MIhngi haba buh hakhmat ia ka jingpyntip ba kam shym la don shuh kano kano ka jingjia huri hura ha kine ki arsngi bala leit noh.
