Imphal, Iaiong 25: Kumba 40 ngut ki nongshong shnong Kuki, kiba bun ki dei ki kynthei bad ki khynnah, ki la leit rieh tngen ha Kachouphung, ka shnong ki Tangkhul Naga, kaba don hajan khappud ka Indo-Myanmar, hadien ba ki ïing ki sem jong ki, ki la shah thang ha ki riewkieng atiar ki bym lah ban ithuh.
Kine ki nongshong shnong ki dei kiba la pynkynriah na ka shnong Gambal bad Haiyeng ha ka distrik Kamjong jong ka Manipur hadien ka jingshah thang ki iing ha ka 23 tarik Iaiong.
Katkum ka jingïathuh u Superintendent of Police ka Kamjong, u Ningshem Vashum, baroh ki ïing kiba la shah thombor ki don 28 tylli—16 tylli ha Gambal bad 12 tylli ha Haiyeng. Na kine, 14 tylli ki ïing ha Gambal bad 8 tylli ha Haieng ki la shah pynjot lut.
Ka Kachouphung, kaba don kumba 14 km na ki shnong ba la shah thombor, mynta ka dang ai jaka rieh tngen bad ki jingiarap ba kongsan ia ki briew kiba phetwir (IDPS), kiba bun na ki, ki dei kiba la phet krad bad ki don tang katto katne ki tiar ki tar.
Hadien kane ka jingjia, u District Magistrate ka Kamjong u la pynjari da ki jingpyrkhing ha baroh ar tylli ki shnong kum ka lad jingiada. Ki pulit ki la pynthikna ba ym shym la don kano kano ka jingjia ba sngewsih ha katei ka jingshah thombor.
Ki katto katne ki seng Kuki-Zo, kiba kynthup ia ka Kuki Inpi Manipur bad ka Kuki Students’ Organisation, ki la pynrem jur ia katei ka jingleh donbor. Ki la khot ban tei pat mardor ia ki shnong kiba la shah pynjot, ban iarap thikna ia ki longiing kiba la phetwir, bad ban siew bai lutksan kaba hok ia ki jingduhnong kiba la mad.
