Imphal, K’lyngkot 30: Shiphew ngut ki MLA Kuki-Zomi-Hmar ka Jylla Manipur, ha ka sngi Nyngkong, kila phah ia ka dorkhas sha u Myntri Rangbah Duh ka Ri Narendra Modi ba tyrwa ban shim da kiwei pat ki lad ki lynti ba pynbeit ne pynkut noh ia ki kam umsnam ha Manipur.
Kine ki MLA kila dawa ruh ban ai noh iala ka jong ka bor synshar khadar ia ki Kuki-Zomi-Hmar kat kum ki kyndon jong ka Riti Synshar ka Ri.
Naduh ka 3 tarik Jymmang 2023, ka Manipur kala mad ia ki kam umsnam ba shyrkhei jong ki ar Jaidbynriew bad bun ngut ki briew kila iap ha kane ka Jylla.
Ha ka dorkhas sha u PM, ki 10 ngut ki MLA ki kwah ba dei ban weng noh ia ki Pulit commando jong ka Jaidbynriew Meitei na Moreh bad ban pyntreikam biang ia ka AFSPA ha Manipur Valley.
Kila dwa ruh ban weng noh ia ka Suspension of Operations (SoO) Agreement.
“Ka kam umsnam ha Manipur kala kylla na kaba sniew sha kaba kham sniew shuh shuh, kumba la paw na ki jingjia ba jia ha Imphal-Kangal Fort ha ka 24 tarik Kyllalyngkot 2024, ha kaba ki MLA bad Myntri Sorkar na ka Jaidbynriew Meitei kiba don haduh 37 ngut bad 2 ngut ki MP, kila hap ban bam smai ban kyrshan ia ka kynhun kiengatiar –Arambai Tenggol, kaba long pryshah ia ka jingbam smai bala shim kat kum ka Riti Synshar ka Ri ia ki Nongmihkhmat paidbah” kila ong.
Ka pyntip ba ha katei ka sngi ki MLA Meitei kila shah shoh bad shah thombor hapoh ka Kangla Fort ha ka Arambai Tenggol wat hapdeng ka jingpahara kaba khlain shapoh, shabar bad ha baroh ki khyrdop jong ka complex.
“Naduh ka 3 tarik Jymmang 2023, ki Arambai Tenggol kila hiar thma pyrshah ia ki paid Kuki-Zo. Ka jingsngew iapher Jaidbynriew ha Manipur kala nang heh namar ki kam jong ka Arambai Tenggol. Kine ki riewkiengatiar kila iaid sahuh ha surok ryngkat ki tiar siat bala tuh na ka jaka buh tiar ki Pulit” ong ka dorkhas.
“Ki bor pahara ka Sorkar Pdeng kila shu long tang ki nongpeitkai namar ka jingtreikam shuh ka AFSPA” kala bynrap.
