Kangpokpi, K’lyngkot 15: Ki paidbah ka Kangpokpi District kiba la iamih paidbhur, kila pdiang sngewbha ia u Rahul Gandhi da ka jingkmen ha kylleng ki Jaka ba iaid ka rally Bharat Jodo Nyay Yatra hapoh ka District.
Da ki hajar ngut ki briew kila pdiang ia une u Nongialam ka Congress bad ia ka kynhun ha Gamgiphai, ka jaka ba marjan jong ka District bad ka Imphal West.
U Rahul Gandhi bad ka kynhun ha ryngkat ki paidbah, kila iaid kjat katto katne por ha kane ka thain.
Ha lynti sha District Headquarter ka Kangpokpi, la iohi ia bun bah ki briew ha man ki shnong kila ieng ha ka surok National Highway-2 ban ai khublei ia ka Bharat Jodo Nyay Yatra.
Hapoh District Headquarter ruh, da ki hajar ngut ki briew kila iamih bad ai khublei ia u Rahul Gandhi bad don ruh kiba la rah ia ki placard ba thoh ‘Ngi pdiang sngewbha sha Kukilad, India, Rahul Gandhi”.
Ka Kuki Women Organization for Human Rights kala iakynduh ia u Rahul Gandhi bad pynsngew ha u ia ki jingeh bala mad da ki paidbah Kuki-zo.
Kane ka kunhun iada ia ka hok longbriew manbriew, kala iathuh ruh ha une u nongialam ka Congress halor ki jingjia ha Moreh bad pyntip ba katba ka Sorkar kam pat weng ia ki bor pahara na kane ka sor khappud, kan nym don satia ka jingsuk ha ka thain.
Ka Kuki Inpi Sadar Hills ruh kala aiti ia ka dorkhas ha u Rahul Gandhi.
