Ukhrul, Nailur 17: Ka Kuki CSO Working Committee, Kamjong District, ka la pakhang surok markylliang ha shi lynter ka surok bah National Highway-202 ha Chassad, hadien ba ka jingai por kaba 36 kynta ia ki bor synshar district, ka la kut por.
Kane ka jingleh ka wan pyrshah ïa kaei kaba ka Kuki CSO ka batai kum ka jingkhang ïa ka ïoh ka kot kaba la neh palat hynriew bnai kaba la pynjari nyngkong eh ïa ki jaka Kuki da ki bynta jong ka jaidbynriew Tangkhul ha Kamjong.Ia kane ka jingkynnoh ym shym la pynshisha da kaba laitluid.
La iathuh ba ki kynthei kiba trei mon sngewbha ha Chassad, ki la sdang ban peit ia ki kali bad khanglad ia ka jingleit jingwan naduh ka por shiteng sngi.Ki tyllong khubor na ki pulit ki iathuh ba la kurup ruh ia ki marbam ba donkam man ka sngi kiba la kit da ki katto katne ki nongleit jingleit.
Ka Kuki CSO ka la ai por haduh ka 14 tarik u Nailur, da kaba ong ba ka jingkhang kaba kham mynshwa ka la ktah ia ka jinglah ban ioh ia ki marbam ba kongsan, ki lad kamai bad ka leit ka wan.Ka la wad ia ka jingiarap bad jingiakren mardor jong ka bor synshar, da kaba maham ia ka jingkhang khyrdep kaba khlem kut lada ym lah ban pynbeit.
Ki jingdonkam ba kyrkieh ha ka liang ka jingsumar, ki kali kit nongpang, ki tiar sumar ba kongsan, ki kali shipai, ki jingshakri telecom bad ki jingleit jingwan jong ka tnad bording la pyllait na ka jingkhang dam.
Ka bor pyniaid district bad ki pulit ki dang pynïajan ïa ki nongmihkhmat jong baroh ar tylli ki jaidbynriew ban pynjem ïa ki jingeh bad ban pynphai biang ïa ka jinglong jingman kumba long mynshwa.
