Imphal, Nailur 27 : U Myntri Rangbah ka Jylla N Biren Singh ula ong ba ka kynhun ba kyrpang jong ka Central Bureau of Investigation (CBI) ba lamkhmat hi da u Director, kan poi ha ka sngi Balang ha Imphal da ka liengsuien ba kyrpang, ban tohkit ia ka jingshah pyniap ki arngut ki samla pule.
U Myntri Rangbah haba thoh ha ka X, ula ong “ Halor ka khubor ba sngewpangmet ba mih hynnin ka sngi kaba iadei bad ka jingiap jong ki samla pule ba jah rngai, nga kwah ban pynthikna ia ki paidbah ka Jylla ba ka Sorkar Jylla bad ka Sorkar Pdeng kila iatreilang ban kem ia kiba donkti”.
Ban pynsted ia ka jingtohkit kaba kongsan, u Director ka CBI ha ryngkat bad ki stad ki jhad jong ka, kin wan poi ha Imphal mynta ka step da ka liengsuin ba kyrpang.
Ka jingwan jong ki ka pyni ia ka jingkut jongmut jong ki bor khmih jong ki ban leh eiei mar mar halor kane ka jingjia. “Nga la iakren bad u Myntri kam Pohiing Amit Shah ban wad ia ki briew ba donkti bad ban ai ka jingbishar ba shonghok ia ki”.
Shuwa kane, ka Sorkar Manipur kala ong ba ia kane ka jingshah pyniap ki arngut ki samla pule la aiti ban tohkit sha ka CBI katba ki bor pahara ki dangpynlong ia ka jingkhynra ban kem ia kiba donkti.
Ki Ophisar na ka Chief Minister Secretariat ki pyntip ba ka Sorkar Jylla kala lah ban ithuh ia kine ki arngut ki samla pule kiba jah naduh u bnai Naitung lyngba ka dur bala saphriang ha ki social media bad kine ki arngut ki dei u Phijam Hamjit ba 20 snem bad ka Hijam Linthoingambi ba dang 17 snem.
 ba lamkhmat hi da u Director, kan poi ha ka sngi Balang ha Imphal da ka liengsuien ba kyrpang, ban tohkit ia ka jingshah pyniap ki arngut ki samla pule.){kind=link}