Imphal, Rymphang 4: Ka Ministry of Home Affairs ha ka sngi Balang kala pynmih ia ka jingpynbna ba la weng noh ia ka President’s Rule hapoh ka jylla Manipur bad kane kan trei kam noh mardor.
Kane kala wan tang shi kynta shwa ban bam smai ka sorkar ba thymmai jong ka Manipur ia kaba la pynbeit ban long mynta ka janmiet. Ki MLA jong ka BJP kaba la lam khmat ia ka kynhun synrop ba la tip kum ka National Democratic Alliance (NDA), kila long kiba la khreh ban bam smai hapoh ka jingialam u Myntri Rangbah Yumnam Khemchand Singh.
U Khemchand Singh u dei na ka jaitbynriew Meitei, katba ki ar ngut ki symbud myntri rangbah ba kynthup ia u Nemcha Kipgen bad Losii Dikho — ki dei na ka jaitbynriew Kuki bad na ka jaitbynriew Naga.
U MLA ba la jop hynniew sien kynthih uba mih khmat na Bishnupur district, u Govindas Konthoujam, la ong ba ia u la pynkhamti da ka tnad kam poh ïing. “Ngan trei da ka jingkit khlieh ban shakri ia ki paidbah ka jylla Manipur da ka jingaiti lut ha ryngkat ka jingkit khlieh ban wanrah ia ka shong suk shong sain na ka bynta ki paidbah, ” u ong.
Katkum ka notification kaba la pynmih ha ka Gazette of India (Extraordinary), ka President Droupadi Murmu kala weng ia ka Proclamation issued hapoh ka Article 356(2) jong ka riti synshar ha kaba iadei bad ka Manipur.
Kane ka order, kaba la pynmih ha ka 4 tarik u Rymphang 2026, la weng noh ia ka jingpynjari kaba la pynmih ha ka 13 tarik u bnai Rymphang 2025, kaba pynngat ia ka jylla hapoh ka jingsynshar President’s Rule.
