Imphal, Jylliew 25: Ka jinglong jingman ka dang ima hynrei la lah pat ban tehlakam ha ki katto katne ki jaka ha kaba tang katto katne ki jingjia kila jia katba ka jinglong jingman kala jai jai ha kiwei kiwei ki District.
Ia mynta, ki Pulit ka Jylla bad ki bor pahara ka Sorkar Pdeng kila pynlong ia ki jingiaid pahara bad jingkhynra ha kiba bun ki jaka kiba ikop don jingma ban mih ki jingiaumsnam.
“Ha kine ki 24 kynta bala leit noh, ki Pulit ka Jylla bad ki bor pahara ka Sorkar Pdeng kila pynlong ia ka jingkhynra ha Tamenglong, Imphal-East, Bishnapur, Kangpokpi, Churanchandpur bad Kakching District. Ha kane ka jingkhynra, kila ioh ban pynpra haduh 12 tylli ki bunker jong ki kaikhlaw kiba don ha kine ki District” ong ka kyrwoh.
Kala ong ruh “Ha ka jingkhynra, la ioh ruh ban kurup haduh 3 tylli ki 51mm mortarshell bad 3 tylli ki 84 mm mortar shell na ka pyntha kba ha ka shnong Sahumphai bad uwei u bomb IED na ka pyntha kba kaba don hadpeng ka shnong Kangvai bad S Kotlian. Ia kine ki mortar bad ki IED la pyniap noh ia ka bor da ka State Bomb Disposal Team”.
Ki Pulit ka Manipur kila kem haduh 135 ngut ki briew halor ka jingpynkhein iaki kyndon korphiew, ki kam tuh na iing, kam wiang ding bad kiwei kiwei. Ka jingkhynra bad jingiaid pahara ka dang iai bteng ha kylleng ki jaka jong ka Jylla.
Ki bor pahara kila ioh ban kurup noh haduh 1100 tylli ki tiar siat bad 13,702 tylli ki kuli nalor ki 250 tylli ki bomb haduh mynta mynne.
Pule lang ia kane: Aiti ka Sorkar ia ka song jingiarap ba T. 8 lak sha ka iing i Cafinia bad Maianylla
