Manipur, Nailur 24: U Myntri Rangbah ka Manipur N Biren Singh ha ka sngi Saitjain ula pyntip ba ka Sorkar Jylla Manipur kala thoh sha ka Sorkar Pdeng ba kyrpad ban pynkut noh ia ka soskular Free Movement Regime (FMR Agreement) u snem 2018 hapdeng ka India bad Myanmar, kaba ailad ia ki briew ba sah marjan ki jaka khappud ba kin iarung laitluid haduh 16 kilometer shaki shnong jong baroh arliang pud.
U Biren Singh ula ong ba dei namar kane ka soskular kaba la buh ha ka jingeh kaba khraw bha ia ka Manipur ban tehlakam ia ka jingwan rung kyrthep ki mynder na Myanmar namar ka jingbym don ka jingker sainar ia u pud u sam.
“Ngi la pyntip ia ka Home Ministry ba dei namar kane ka soskular ba ngim shym la lah ban tehlakamia ka jingwan rung ki briew na Myanmar” ula ong.
“Ka Sorkar jong ngi kala kyrpad ia ka Home Ministry ban pynkut noh ia ka Free Movement Regime. Nalor kata, ki bor pahara kiba dei ban buh ha Zero Point, kila hap ban pahara ia u pud u sam haduh 14-15 km shapoh u pud u sam ka India” ula ong.
Ula ong “Ka kam ba hakhmat eh jongngi ka long ban pynsangeh noh ia ka jingwan rung beain na Myanmar. Ia kane, ngi donkam ban ker sainar noh ha khappud. La pyntip sha nga ba ka Home Ministry kala ai ia ka Work Order sha ka BRO ba kan ker sainar kumba 60 km ha khappud ka Indo-Myanmar”.
U Biren singh u ong ba ka jingleh suvey ha baroh kawei ka Ri kala shem ia ka jingkiew ha ka jingjyllei u drok bad jingdon ki samla ba dih drok hapoh ka Jylla, kaba dei ka daw ba ka Sorkar jong u kala pynbna da ka ‘Thma pyrshah ia u Drok’ ha u snem 2018.
“Ngi hap ban pynleit jingmut bha halor ki ishu kiba shisha jong ka Jylla, kata ban iakhun pyrshah ia ka jingwan rung beain ki briew ba nabar Ri, ban leh ia ki kam iarap para briew na ka bynta kito ki nongshongshnong ba kylla phetsiew bad ba iakhun pyrshah ia ka kam rep poppy” ula ong.
Kat kum ka MHI, haduh 563 ngut ki kaikhlaw kila shah kem bad 47 ngut kila shah siat iap ha khappud ka Indo-Myanmar hapdeng u snem 2015 bad 2018.
U Biren Singh ula kren ruh halor ka jingkongsan ban pynrung kyrteng Biometric noh ia ki nongshongshnong da kaba pyntreikam ia ka NRC bad ka Sorkar Jylla kala kyrpad ia ka Sorkar PDeng ban nang pynjlan ia ka por ha kaban leh ia kane ka kam da shisnem hapoh ka Jylla.
