Imphal, Naiwieng 04: Ki bor pahara ka Manipur kila kyntait ia ki jingkynnoh jong ki 10 ngut ki MLA bad ki kynhun seng jong ki Jaidbynriew Kuki ba ong ba ki Pulit Commando kila thombor ia ki paid riewlum ha Moreh.
Ki 10 ngut ki MLA bad arngut ki seng jong ki Kuki ba kynthup ia ka Kuki Impi Manipur (KIM) bad ka Indigenous Tribal Leaders’ Forum (ITLF) – ha ka sngi thohdieng kila kynnoh ba ki Pulit ka Jylla kynthup ki Pulit Commando, ha ka jingkhynra hapoh sor Moreh, kila wiang ding ia ki iing, siat naphang bad lute ia ki jingdon jingem ki paidbah nalor ka jingktah kti ia ki nongshongshnong kynthup ia ki kynthei, ha kaba bun ki paidbah kila hap ban phet sha ki khlaw ba marjan.
Uwei u Heh Pulit ha ka saitjain ula kyntait ia kine ki jingkynnoh bad ong ba ki dei ki kam kai suda bad ba khlem nongrim.
U Ophisar uba iadon bynta lang ha kane ka jingkhynra (uba kyrpad ban burieh kyrteng), ula iathuh ba kam ju don satia ki jingjia kumba la kynnoh bad batai ba ki bor pahara ki la rah lang ia ki camara video, ka ban ioh ring beit lada don kano kano ka jingleh bakla ha ka por ba pynlong ia ka jingkhynra.
Ha ka por ba pynlong ia ka jingkhynra, lai ngut ki Pulit kila mynsaw ha kaba sdang jong ka taiew namar ka jingshah hiar thma kynsan kynsan ha shnong Sinam ha ki kaikhlaw Kuki.
Kane kala jia ha ka por ba ki bor pahara kila hiar kyrkieh ban pynkhlain ia ka jingpahara hadien ka jingshah siat iap u SDPO ha Moreh ha ki kynhun kaikhlaw kaba jia ha ka sngi Ba-ar bala lah.
Ka jingkynnoh jong kine ki MLA bad ki kynhun seng ki Kuki kala mih hapdeng jong ka jingkhynra kaba la sdang naduh ka 1 tarik Naiwieng, hadien ka jingshah siat iap u SDPO.
