Imphal, Jymmang 02: U Myntri Rangbah ka Manipur N. Biren Singh hynne ka sngi Ba-ar, ula kynnoh ba dei ki poiwir na Myanmar kiba wanrah ia ka jingstang ki khlaw ki btap, ka jingrep ia u poppy bad ka jingjyllei u droks hapoh ka Jylla.
“Ban iada ia ka Jylla, ka Sorkar kala pyntreikam ia ka Green Manipur Campaign, ithuh ia ki jaka jong ka khlaw Reserve bala shong briew, kyntiew ia ka rep soh bad jhur bad pynjulor lut ia baroh ki jaka rep poppy. Ka jingiakhun pyrshah ia u droks ka la iaid shaid shaid mynta” ong u Biren.
Ha ki jingthoh bala thep ha ki social media, u Myntri Rangbah ula ong ba ka Sorkar kan dang iai bteng ban pynleit jingmut eh ha kaban iada ia ka Manipur bad ia ki paid nongshongshnong riewlum.
Haba buh lang ia ki dur jong ki arngut ki nongkhaii droks, u Myntri Rangbah ula thoh ha tweeter : “Kine ki dei ki briew kiba pynjot ia ka pateng ban dang wan jong ngi. Kila pynjot ia ki khlaw jong ngi bad thung da ki poppy, ban kynshoit ia ka jingsngew iapher jaidbynriew khnang ban lah pyniaid ia ka kam khaii droks”.
U Myntri Rangbah ula kdew ia kine kiei kiei namar ka jingnang shryrkhei ki jingkulmar kynthup ka kam wiang ding bad pynjulor ia ki nongkynti ka sorkar, kiba la jia ha ka taiew bala lah hadien ba ki aid irelum kila mih ban iakhih pyrshah ia ki sienjam jong ka Sorkar ban pynjulor ia ki jaka rep poppy ha ki khlaw sorkar, khamtam ha ki khlaw reserve ha ki jaka lum.
Ha kajuh ka por, ka korphiw miet kan dang iai bteng haduh saw sngi lynter hynne ka sngi ba-ar ha Churachanpur District watla kam shym la don shuh ki jingkulmar na kane ka district ha kine ki 72 kynta bala leit noh.
Ki kynhun riew lum kynthup naduh ka Naga Students Union Chandel, Sadar Hills Tribal Union on Land and Forest, Tangkhul Katamnai Saklong bad ka Tribal Church Leaders Forum kila pynbna ia ka jingkyrshan ia ka ‘”tribal solidarity march”.
Ka ATSUM kala pyntip ba ia kane ka rally yn pynlong kum shibynt ban pynpaw ia ka jingpyrshah halor ka jingiai dawa jong ka jaidbynriew Meitei ban pynrung ia ki ha ka Scheduled Tribe ka Jylla bad ka jingdonkam banshim ia ki sienjam ha kaban ai ka jingiada ia ka bha ka miat ki paid riewlum ka Jylla.
