Imphal, Naiwieng 30: Ka jingiakhih shong kyllain mungor jong ki lanot ba kylla phetwir ha Kangla Western Gate, ka la khring ia bun bah ki paidbah lyngba ka jingwan iashim bynta jong ki phetwir na Churachandpur, Moreh, Ikou, Dolaithabi bad Torbung kiba la dawa ba dei ban shah noh ia ki ba kin leit phai biang shala ki shnong.
Ki phetwir kiba sah mynta ha ki jaka sah shipor ha kylleng ka Bishnupur, Thoubal, Imphal East bad Imphal West—ki la sdang ïa ka jingïakhih da ki jingpyrta kum “Eikhoi yum da halhanbiyu” (dei ban shah ia ngi ban leit phai noh sha la ïing), “Sangai Festival” touba yaningde” (ngi pynrem ïa ka tamasa Sangai, “Sarkar gi Thouwong yaningde” (Ngim pdiang iaka jingleh ka Sorkar).
Ki kyntien pynrem jong ki, ki pynpaw ïa ka jingbitar namar da ki bnai mynta ki don sah haki jaka sah shipor bad ki pynpaw ruh ka jingbitar daka ba kynnoh baka Sorkar Jylla ka shimkhia iaka tamasa Sangai ban ia ka jingjynjar jong ki briew.
Haba kren ha kane ka jingialang, u nong shong shnong ka Churachandpur, u Irom Abu Meitei u la kynthoh ia kaei kaba u la khot ka jingpyrshang jong ka Sorkar ban pyni baka jingsuk kala wanphai sha Manipur. “Ka jingsuk kam pat wanphai sha Manipur, hynrei ka Sorkar ka kwah ban pyni ba baroh ki long biang lut. Ki nong shah pynkynriah shnong ki dang sahkut ha ki jaka sah shipor haduh mynta khlem kino kino ki jingiarap naka Sorkar. Ngi la dei ban lah ban leit phai biang shala iing hynrei kata ka jingthmu ka la pulom,” u la ong.
U la buh jingkylli lano, khatduh ki IDP na Moreh, Kangpokpi bad Churachandpur kin ioh ban leit phai noh sha la iing.
Katba ka jingialum paidbah kala nang bun, ki heh pulit ki la sheptieng ba ki nongiakhih ki lah ban tur sha Raj Bhavan. Ki bor pahara ki la pynkylla iaka lynti iaid ki nongïakhih lyngba ka Over Bridge sha jaka bazar ban ïada na ka jingjur jong ka jingïakynad.
Ka jingïalang ka la ïoh bor ha shilynter ki lynti iaid kjat namar ki longïing kiba la shah pynkynriah naki jaka ki nang ïasoh lang, ha kaba khatduh ki la ïaid paidbah naduh Kangla Western Gate sha Uripok.
Ka jingialang kala kut ha Uripok Community Hall, ha kaba ka Coordinating Committee on Manipur Integrity (COCOMI) kala pynlong ia ka jingialang paidbah.
Ki nongkren ki la kynnoh ba ka Sorkar ka la iehnoh beiñ ïa ki hajar ngut ki IDP kiba dang sahkut ha ki jaka sah shipor hadien 18 bnai ba la mih ka jingïakynad hapdeng ki jaitbynriew.
Ki la kynthoh ïa ka rai ban ïaid shakhmat bad ka Tamasa Sangai, da kaba ong ba ka dei ka jingpyrshang ban ialam bakla ba baka jingsuk kala wanphai ha Manipur.
U snem 2025 u la jan kut katba kiba shah pynkynriah kim pat shai, lano kin ioh leit phai biang shaka Shnong bad kane kan buh jingeh iaka Sorkar Jylla ban wanrah biang iaka shong suk shong shngain hapoh ka Jylla.
