Imphal, Iaiong 6: Kumba 10 ngut ki briew ba kynthup ruh ia ar ngut ki nongialam shnong kila shah shoh shah pynmynsaw ha ki suba lehnoh Kuki na ka jingia kajia jaka ha Kangpokpi district jong ka jylla Manipur ha ka sngi Saitjain.
Katkum ki kaiphod la iathuh ba ki ar ngut ki nongialam shnong kiba la mynsaw kidei na ka jaitbynriew Naga.
“Kane ka jingjia kala jia ha ka janmiet sngi Saitjain ha ka shnong Konsakhu ha ka por ba ki paid bhur kiba ym duna ia ka 200 spah ngut kaba la synran lang da ki lehnoh Kuki kila wan rung hapoh ka shnong bad kila shoh pyn mynsaw ia 10 ngut ki nong shong shnong ba kynthup ruh ia ar ngut ki khlieh nongialam shnong” ong ki pulit.
Ia kine ki ar ngut ki khlieh nongialam shnong la ithuh kyrteng kum u Aimson Abonmai (65) snem bad u D. Adam (40) snem kiba la mynsaw ha ryngkat bad ki phra ngut ki nong shong shnong kila ioh ka jingsumar ha ki hospital bapher bapher.
Halor kane ka jingjia ka Rongmei Naga Council kala pynrem jur ia kane ka jingshah wan thombor.
Kum shi bynta ban teh lakam ia kum kane ka jingjia la phah shuh shuh ia ki bor pahara sha ki jaka ba shong basah ki Naga.
Kane ka jingthombor khlem daw ka la pynmih biang ïa ka jingïakynad hapdeng ki jaidbynriew ha kane ka thaiñ bad kane ka la pynthut ïa ka jingïadei hapdeng ki jaitbynriew.
Ha ka 7tarik Kyllalyngkot, kawei ka longkmie riewlum, kaba trei ha ki jaka rep ha Konsakhul, ka la shah thombor ha ki lehnoh Kuki, ha kaba ki la pynduh ruh ia ka mobile phone jong ka.
