Imphal, Nohprah 19: U Myntri Rangbah ka Manipur N Biren Singh ha ka sngi Nyngkong ula ther tyngeh ia ki mafia die drok bad ki poiwir halor ka jingmih ka thma iapher Jaidbynriew kaba la neh bun bun bnai hapoh ka Jylla.
Haba kren ha ka jingialang ha Lilong ha Thoubal, u Biren Singh ula ong “Kane ka jingiakynad baroh ka dei kaba la kynshoit da ki mafia drok bad ki poiwir kiba la pynsngap jar ia ka sur jong ki trai riewlum. Ka thma kam dei hapdeng ki Meitei bad ki Kuki hynrei hapdeng ka Sorkar bad ki poiwir”.
“Man ka sngi, nga ju iakren bad ki paralok Kuki jong nga lyngba ka phone. Ki sngew kut lad bad ym lah ban kren ia ka jingshisha namar la pyntieng pynsmiej ia ki da ki ktang suloi” ong u Biren Singh.
U Myntri Rangbah ula ong ruh “Palat 6000 ngut ki poi wir kila rung hapoh Kamjong District na Myanmar” namar ka thma ha katei ka Ri kaba long hapdeng ki shipai bad ka kynhun Anti-Junta. Ngi la phah ia ka kynhun ki Pulit ban peit pyrman ia ka jinglong jingman, lum kyrteng bad ban pynbiang ia ki jaka sah ba shipor ia kine ki briew”.
Haduh mynta, kumba 200 ngut ki briew kila iap bad palat 60,000 ngut kila im khlem iing namar ka thma iapher jaidbynriew hapdeng ki Kuki bad ki Meitei kaba la khie naduh u bnai Jymmang.
