Imphal, Rymphang 1: Ka kam sain pyrthei hapoh ka jylla Manipur ka la khih phaloh ha ka sngi U Blei namar baroh ki MLA ka NDA, kynthup ki MLA ka BJP bad kiba iatreilang, kila iahiar kyrkieh sha Delhi ban iashimbynta ha ka jingialang ba kongsan, namar ka jingmih ki khubor halor ki kam thaw Sorkar ha ka Jylla.
Katkum ka tyllong khubor na ka party, la ong ba ki nongthaw ain ki la shah khot hajir ha u Sambit Patra, uba dei u in charge jong ka BJP ha Northeast, na ka bynta ka jingialang kaba la buh ban long ha ka por 2 baje janmiet jong ka sngi Nyngkong.
Kane ka jingkhih khohreh kaba kynsan ka wan hadien ka jingpynjari ia ki rule jong ka sorkar pdeng kaba la slem bha ha ka jylla bad tang katto katne sngi shwa ba ka jingshah sospon ïa ka ïing dorbar thaw aiñ jong ka Manipur kan kut noh ha ka 13 tarik u Rymphang.
Kane ka kam ka la shim ia ka jingmut hapdeng ka jingbym thikna ha ka sain pyrthei ha ka jylla, khlem da don ka jingshai kaba thikna hato yn thaw ia ka sorkar ne lada ka ain jong ka sorkar pdeng kan dang iai bteng.
Haba kren ha ki nongthoh khubor shwa ban leit sha Delhi, u MLA ka BJP u Sorokhaibam Rajen u la ong ba yn sa iakren ia ka jingthaw sorkar ha katei ka jingialang, hynrei u la bynrap ba un kohnguh ia ka rai jong ka party.
“Ka jingthaw sorkar kan dei ka agenda.Hynrei uno uno u nongmih khmat ba jied da ka Centre u long uba lah ban pdiang ha nga”, u la ong.
Uwei pat u nongthaw aiñ jong ka BJP, u L Nishikanta, u la sngewkhia pyrshah ïa ka jingkynnoh, da kaba ong ba ki rai jong ki nongïalam ki bud ïa ka rukom treikam hapoh jong ka seng bad kim dei ban shah ktah ha ki jingïathuh khana ha ki social media.
Haba pynpaw ïa ka jingkyrmen, u MLA u Heikham Dingko u la ong ba u don ka jingkyrmen ba kan mih ka jingmih kaba bha na ka jingïamir jingmut ha Delhi.
Shuh shuh ha ka jingpynpaw ia ka jingmih ha ka sain pyrthei, u nongialam ba rangbah jong ka BJP u A Sharda Devi bad kiwei kiwei ki nongtrei jong ka seng ruh ki la mih na Imphal ban leit sha New Delhi ha ka sngi U Blei, kaba pynskhem ia ka jingkynnoh ba ki rai ba kongsan jong ka seng bad ka nongialam kiba iadei bad ka jylla Manipur lah ban shim ha ka kyrdan jong ka central level.
Katba ki dak saiñ hima sima kiba pher ki dang ïai bteng ban mih na ki bynta jong ka jylla. Katba katto katne ki seng Kuki ki la pyrshah paidbah ia ka jingthaw ia ka sorkar, khamtam ha ki jaka them, ka la don ka jingdawa kaba nang jur na ka thain them ban pynioh biang ia ka sorkar ba la jied.
Ki nongpeit pyrman ha ka saiñ hima sima ki ong ba ki kyrdan kiba ïapher ki pynpaw ïa ki jingbakla kaba khraw ha ka saiñ hima sima jong ka Manipur, wat haba ka jingpynbor jong ki paidbah ka nang kiew ban pynkut noh ïa ka jingbym thikna ha ka saiñ hima sima kaba la neh slem bha.
U Myntri Rangbah barim ka Jylla N Biren Singh u ba la leit ruh sha New Delhi ha ka Sngi U Blei bad u la ong ba baroh ki paralok ka NDA na Manipur ki la shah khot sngewbha da ka Centre na ka bynta ban iakren.
“Mynta ka sngi, baroh ki paralok ka NDA ki shah khot sngewbha da ka Centre.To ngin kyrmen ba kan mih kaei kaei kaba bha”, u la ong haba kren sha ki nongthoh khubor ha Imphal International Airport.
U la ong ba katei ka jingialang ka long kaba donkam bha namar ba la iadon lang baroh ki paralok ba iatreilang bad ka NDA, ym kum ka jingialang kaba kham mynshwa kaba la don lang tang ki MLA ka BJP. Haba iadei bad ka por jong ka sain pyrthei, u Biren Singh u la kdew ba ka jingsah suspension Manipur Legislative Assembly’s kan kut ha ka 12 tarik u Rymphang.
Haba jubab ia ki jingkylli, u Biren Singh u la ong ba ka jingsynshar ka dei ka kam kaba iaid beit bad u la kam ruh ba katto katne ki projek pynroi kiba la sdang ha ka por jong u ki la jan dep. U la kdew ia ki kam shna surok maw, ki jaka sah jong ki ophisar sorkar ha Checkon, Imphal bad ka Deputy Commissioner complex napdeng kiwei pat.
“La nga don ha ka bor ne em, nga la pyrshang katba lah ban wanrah ïa ki jingkylla kiba lah ban ïohi ha Manipur,” u la ong.
Da ka jingleit jong ki MLA bad ki nongïalam ba rangbah jong ka NDA sha ka nongbah jong ka ri bad ka por ba la buh da ka riti synshar ka la jan, la ïohi ba ka jinglong jingman ha ka saiñ hima sima ha Manipur, ha kaba ha kine ki sngi ban wan la khmih lynti ba kin lah ban pynbeit ïa ka jinglong jingman jong ka saiñ hima sima jong ka jylla.
