Imphal, Rymphang 24 :Ki shipai Commando ba kyrpang ha Khabeisoi, Imphal East, ki la ioh ban kem ia sawngut ki nongialam jong ka kynhun kieng atiar National Socialist Council of Nagaland (IM) ha ka por ka jingkhynra hapoh Inter State Bus Terminus (ISBT), Khuman Lampak mynta ka sngi 24 tarik.
Katkum u Superintendent of Police/Railway uba dei u In-charge jong ka Special Commando Unit, Khabeisoi, u Th. Krishnatombi Singh u la ong ba kane ka kynhun pahara ba kyrpand na ka tnat shipai 16 Assam Rifles hadien ba ki la ioh jingtip ha kaba iadei bad ka jingdon jong ki suba lehnoh ha ki jaka paidbah jong ka ISBT, kumtaruh ki la leit ban pynlong ka jingkhynra ha ka por kumba 9:45 mynstep.
Ha kane ka jingleit khynra kine ki bor pahara ba kyrpang ki la shim ruh ia ki sienjam ki ban ym ktah ha kaba iadei bad ka jingpynlong dorbar jong ka Manipur Legislative Assembly.
Ha katei ka jingkhynra, kitei ki sawngut ki suba ia kiba ym lah ban ithuh ki la shah kem noh. Ia ka kyrteng jong kine ki briew kiba la shah kem ym pat shym la pyllait satia.
Kane ka jingkhynra ka la long kaba seisoh ha kaba la ioh ban kem noh ia kine ki suba nongialam jong ka NSCN(IM), bad kaba la noh synniang ruh ha kaba iadei bad ka jinglah ban tehlakam ia ka jinglong jingman hapoh ka thain.
Kham hashwa, kata ha ka 23 tarik mynta u bnai uwei u nongialam ka NSCN-IM ia uba la tip kyrteng kum u Lanuwati Jamir u la shah kem noh halor ka jingdonkti ha kaba pynbor ia ki paidbah ba kin ym bud ia u nongialam ka BJP ka Nagaland u Temjen Imna Along.
U Lanuwati Jamir u la soi ia ka shithi ba la pynmih da ka seng NSCN-GRPN kaba la hukum ia ki nongshong shnong hapoh Alongtaki constituency ha Nagaland ba kim dei satia ban bud ia une u nongialam ka BJP ka jylla u Temjen Imna Along. Ia u Jamir la kem noh da ki shipai ka Assam Rifles ha ka miet jong ka 22 tarik mynta u bnai.
