Imphal, Rymphang 14: Ki pulit ka Jylla Manipur ki la kem ia 5 ngut ki briew hadien ba ka video jong ki ka la saphriang ha ki rynsan Social Media ha kaba la iohi ia ki ba ki ialehkai phutbol ha ryngkat ka bat ki tiar ialeh kynthup ia ki suloi AK-47 ba la kit halor ki tyrpeng jong ki.
Kine kiba shah kem ki dei kiba la tip kyrteng kum u Mangtinlen Kipgen @ Baemang (26 snem), u Mangtinlen Kipgen (24 snem), u Seithenmang Kipgen (28 snem), u Lunminsei Kipgen (21 snem), bad u Lunkhogin Kipgen (24 snem).
Ka video kaba la saphriang ha ki rynsan social media la iohi kumba 10/15 ngut ki briew bym lah ban ithuh kiba phone jain camofly bad katto katne ngut ki briew kiba phong jain ialehkai phutbol kila bat tiar ialeh ha ryngkat ka lehkai phutbol kaba pynphien iaka Arms Act 1959.
Ha ka video la iohi ia ki ba ki dang ialehkai phutbol ha madan shnong K Gamnomphai hapoh ka Saitu Sub-Division kaba hap hapoh ka G Saparmeina police station kaba don ha Kangpokpi district Manipur.
Katkum ka jingiathuh ki pulit, kitei ki jingkem ki dei hadien ba ki la ioh ia ka video kaba la saphriang ha ki social media bapher bapher kum ka YouTube, WhatsApp, Facebook, bad kiwei kiwei.
“Ngi la register case pyrshah iaki. Ngi la sdang. Ngi la sdang ia ka jingtohkit,” la ong uwei u heh pulit.
Ki pulit ki la iathuh ba la register ia ki mukotduma kiba iadei pyrshah ia ki bad la sdang ia ka jingtohkit kaba kham bniah.
Ka tnat kam pohiing ka Sorkar Pdeng ka la pynbna ba la pynjari da ka President’s Rule ha Manipur.
Kane ka la jia katto katne sngi hadien ba u Myntri Rangbah ka Jylla u Manipur u Biren Singh u la phah ka shithi iehnoh kam jong u sha u Lat ka Jylla.
