Imphal, Risaw 04: Ki bor pahara ki la kem ia 12 ngut ki suba ehrang kaikhlaw jong ki kynhun bapher bapher na kylleng ki distrik ka Jylla Manipur, ba kynthup ia 5 ngut ki dkhot ka United Kuki National Army (UKNA).
Ki dkhot ka UKNA kiba la shah kem ki kynthup u Paolenlal Kipgen (30 snem), Kamgoulen (23 snem), u Lhunkholen Singson (26 snem), u Khaiginpau (37 snem) bad u Thangzasuan (14 snem).
“Ngi la ioh kurup ia ka M79 grenade launcher, kaba don lai tylli ki bom, ar tylli ki pistol 9mm kiba don 5 tylli ki kuli, 8 tylli ki radio, 4 tylli ki charger, 8 tylli ki juti khlaw, 3 kg u symbai opium, bad 3 tylli ki mobile phone”, ong uwei u heh Sorkar.
Ha ka 2 tarik Risaw ki bor pahara ki la kem ïa uwei u ehrang ba kam ialade kum u Commander-in-Chief ka kynhun kaikhlaw Kuki —ka Chin Kuki Mizo Army (CKMA) u Paokholen Guite na Churachandpur district.
Ki heh Sorkar ki ong ba u Guite u la donkti bha ha kaba khaii beain ia ki mar mata bad u drok ha kylleng ki jaka khappud India bad Myanmar na ka bynta ki kynhun kaikhlaw ki bym pat iasoi sangeh ia siat bad ka Sorkar Jylla bad u donkti ruh ban dawa pisa.
Ki bor pahara kila kurup ka ar tylli ki suloi AK-47 kiba don ar tylli ki magazine, 31 tylli ki kuli 7.62 AK-47, 150 tylli ki kuli 7.62 SLR bad LMG, T.1 lak ka pisa, kawei ka pla kuli, kawei ka kali mobile, bad ar tylli ki kuli.
Ki bor pahara ki la pynjur ia ki kam pyrshah ia ki kaikhlaw ha kylleng ka jylla Manipur ha kine ki taiew ba la dep.
.){kind=link}