Imphal, Nailar 17: Ki bor pahara ha Manipur ki la kem ïa ki khyndai ngut ki dkhot jong ki kynhun kaikhlaw ba la khein beain, ha ka jingkhynra jong ki bor pahara ha kylleng ki district jong ka Thoubal, Kakching bad Churachandpur hapdeng ka 9 bad ka 16 tarik u Nailar.
Kitei ki dkhot kiba la shah kem ki don jingiadei bad ki kynhun ba la khang, kynthup ia ka People’s Liberation Army (PLA), ka kynhun ba la khang pyrshah ka Revolutionary People’s Front (RPF), ka United People’s Party of Kangleipak (UPPK) bad ka United Kuki National Army (UKNA).
Ia kane ka jingkhynra lang la pynlong da ki shipai Assam Rifles, ki pulit Manipur, ki Kakching bad Thoubal Commando Unit.
“Ngi la ioh kurup ia ki tiar ialeh, ki kuli bad ki tiar pynbthei kiba bun bha ha ka por ba ngi pynlong ia ka jingkhynra.Ki tiar ba la ioh kurup ki kynthup ia kawei ka suloi AK-47, kawei ka suloi .303 light machine gun ryngkat bad u barrel ba la pyndap, lai tylli ki suloi INSAS, saw tylli ki single-barrel bad ar tylli ki suloi 9mm”, la ong u heh ophisar.
U la ong ba ki bor pahara ki la ioh ruh ban kurup haduh 2,156 tylli ki kuli jong ki calibre bapher bapher, 29 tylli ki magazine, 157 tylli ki kuli thylli, 1.5 kg ki commercial plastic explosives, 14 tylli ki detonator bad ki tiar pyntip.
Kane ki jingkem ki long hadien ka jingkyrpad biang jong ka sorkar jylla ïa ki briew kiba don ïa ki tiar beaiñ ban aiti noh ïa ki.
Dang shen, u Myntri Rangbah ka Jylla Manipur, u Yumnam Khemchand Singh, u la kyrpad ïa ki briew kiba don ïa ki tiar pynmynsaw beaiñ ha baroh ar ki thaiñ lum bad them ba ki dei ban pyndem noh ïa ki hapoh 15 sngi lane kin shah pynshitom katkum ka aiñ.
U Singh u la maham ba kino kino ki bym lah ban pyndem ia ki tiar ialeh beain hapoh ka por ba la buh kin ngat ha ka jingshah pynngat ha ka ain.
U Myntri Rangbah ka Jylla u la ong ruh ba ka roi ka par hapoh ka jylla ka la shah ktah jur naduh ba la mih ka jingiakynad hapdeng ki ar jaitbynriew ha Manipur kaba la sdang naduh ka 3 tarik u Jymmang, 2023.
