Imphal, Jymmang 11: Ki bor pahara kila kem ia 13 ngut ki kai khlaw kiba dei na ki san tylli kynhun bapher bapher na kylleng ki jaka jong ka jylla Manipur ha ka jingbteng ban khynra pyrshah ia ki kynhun kai khlaw.
“Kane ka jingkhynra la pynlong la kumba 36 kynta bad la buh thong ba ki khynra ha ki jaka ba kongsan bad lam ruh sha ka jingioh ban kurup ia ki tiar siat, ki kuli, 13 tylli ki kynja tiar ban ia kren, ki pisa ba dawa na ki briew, kawei de ki tiar” ong ki heh ophisar pulit.
Napdeng kiba la shah kem ki kynthup ia saw ngut na ka kynhun Kangleipak Communist Party (KCP-MC Progressive), kiba la shah kem na ki jaka rieh tngen ha Imphal West, Imphal East, Kakching, Thoubal bad na Bishnupur districts.
Ha kawei pat ka jingkhynra, lai ngut ki dkhot ka KCP People’s War Group kila shah kem na Thoubal, Imphal West, bad na Bishnupur.
Katkum ki pulit, kine ki kai khlaw kiba la shah kem kidei kiba donkti ban leh ki kam dawa pisa bapher bapher da kaba buh ia ka thong ban thew beit ia ki briew ba trei kam sorkar, ki ophisar bad kumjuh ruh ki riew paidbah jong ka dong ka thain.
“Kane ka jingioh ban kdiah ia u budlum jong ki kai khlaw kan iai bteng bad ngin peit bha ban thaw ia ki lad ki lynti ban pynduh jait ia ki kam kai khlaw hapoh ka jylla Manipur,” ong u heh ophisar.
Ha kajuh ka por, ki bor pahara kila sdang ban khynra kaba jur ban pyndkoh ia ki kam kai khlaw hapoh ka jylla hadien ba la pynjari da ka President’s rule hadien ar snem jong ka jingjia ia um snam.
