Imphal, Nailur 25 : Ka Kuki Impi Manipur (KIM), ka sengkmie ki Jaidbynriew Kuki, ha ka sngi Nyngkong kala onng ba ka thma jaidbynriew ba bym kut shuh ha Manipur ka dei ka plan bala suhbuit bha jong ki Jaidbynriew Meitei ba hehpaid “ban iakhun iala ka jong ka Ri ba laitluid” bad ban mih noh na ka Ri India.
“Kane kala paw na ka jingphla jong u Moirangthem Anand Singh, uba la shah kem dang shen ha ka National Investigation Agency (NIA) halor ka case ba iadei bad ka jingiasuhbuit bad ki Nongialam kaikhlaw na Myanmar, ban hiar thma pyrshah ia ka Sorkar India da kaba shim kabu ia ka thma iapher jaidbynriew ha Manipur” ong ka KIM.
U Moirangthem Anand Singh (45), khun jong u (L) Achou Singh na Singjamei Makha Sorokhaibam Leikai, u dei u ehrang bala shah dep pyntbit jong ka People’s Liberation Army (PLA) bad hadien ula leit pyniasoh bad ka Kangleipak Communist Party (KCP)-Noyon Group.
Ha ka kyrwoh bala pyllait da ki Pulit ka Manipur, u Moirangthem Anand Singh ula shah kem haduh hynriew sien kata ha u snem 1997, 2001, 2002, 20024, 2005 bad 2009 mynba u dang don hapoh ka PLA bad ula shah kem biang ha u 2010 hadien ba ula iasoh bad ka KCP.
Dang shen, ha ka 16 tarik Nailur ula shah kem ha ryngkat bad saw ngut kiwei pat ryngkat ki tiar ialeh hynrei ula ioh jamin noh tang hadien khyndiat sngi lem bad ki 4 ngut kiwei pat.
Hynrei, ka NIA kala kem biang ia u halor ka case ba iasuhbuit bad ka kynhun kaikhlaw na Myanmar bad la ialam noh ia u sha New Delhi.
U Information Secretary ka KIM Janghaolun Haokip ula ong ba ka jingshah kem dang shen jong u Moirangthem Anand Singh ha ka NIA kala sei madan ia ka jingiasuhbuit jong ka kynhun kaikhlaw ki Meitei ban iakhun laitluid noh na ka Ri India.
Ula ong ba kam don satia ka jingartatien ba kane ka jingiasuhbuit kala don la slem bad kala paw na ki katto katne ki nongialam kane ka kynhun kaikhlaw ba shun ia ka Ri India bad kiba treikam na Myanmar.
Une u Nongialam ka KIM ula ong ba ka jingeh ha kane ka kam ka shong ha ka jingkynnoh rung jong kine ki kynhun kaikhlaw sha Imphal kaba la iarap da ka Sorkar u N Biren Singh bad ba kyrshan da ki jaidbynriew Meitei ban hiar thma ia ki jaidbynriew Kuki-Zo.
