Imphal, Naiwieng 28: Namar ka jingthung ne rep beain ia u Poppy, ki bor pahara hapoh ka jylla Manipur kila pynjot bad pynduh ia ka jaka kaba la kot haduh 110 akar ba la rep beain ha kylleng ki jaka lum jong ka Kangbadpokpi bad ha Senapati District.
Ka kynhun ba iatrei lang ba kynthup naduh ki bor pahara bad ki nongtrei ka Forest Department kila pynkhuid ia ka jaka kaba don haduh hynriew akar ba la thung beain ia u poppy ha Ngamju hill kaba hap hapoh ka jingpeit jong ka Purul Police Station ha Senapati district. Une u poppy uba la shah pynjot la antad ba u shongdor haduh T. 55 lak ha ka iew die drug ba rieh ha kane ka thain.
Ha ka jingïatreilang, ki bor pahara, da ka jingïarap jong kaDepartment bad ka Narcotics Control Bureau (NCB), kila jynrat bad pynduh noh haduh 103 akar ka jaka rep poppy ha kylleng ki jaka jong kine ki ar tylli ki district.
Ki bor pyniaid ki la pynpra ruh ia 30 tylli ki ïing trep barit ba la tei ha kine ki jaka rep poppy bad kila ioh ruh ban kurup bad pynduh haduh 17 byrni u sboh, 37 tylli ki song dawai pyniap khniang, 13 byrni ka mluh, bad ki tiar bapher bapher kiba la pyndonkam ha kane ka rep beain, ban khanglad ia ka jingthung biang hadien habud.
