Imphal, Naitung 27: Kumba 27 ngut ki briew kynthup ia 2 ngut ki nongthoh khubor bad arngut ki Khynnah, 2 ngut ki Kynthei kila jah rngai na kylleng ki jaka ka Jylla Manipur, kaba dang don hapdeng ka thma iapher jaidbynriew.
Ki arngut ki nongthoh khubor jongki lad pathai khubor ka Manipur ki dei u Atom Samarendra Singh ba 47 snem bad u Yumkhaibam Kirankumar Singh ba 48 snem.
“Kine ki 27 ngut ki dei kiba la jah rngai naduh u bnai Jymmang, katto katne ngut ha u bnai Jylliew bad kiba tam ha u Naitung bad ki briew ki dei kiba sah ha Imphal West, Imphal East, Tengnaupal. Bishnapur, Kangpokpi, Thoubal bad Kakching District. Ia kane ka jingjah rngai la pyntip ha ki Police Station bapher bapher” ong ki Heh Sorkar.
Kawei ka samla pule ba kyrteng ka Luwangbi Linthoinganbi Hijam ba dang 17-year ka rta ruh kadei kawei na kiba la jah rngai. Ki rta jong kine ki briew ba jah rngai ki long hapdeng 17 snem haduh 48 snem.
Ha kajuh ka por, ka Sorkar Manipur kala pyrshang ban lum jingkhein ia ka jingdon ki briew ba jah rngai na ki paid riewlum ha kane ka Jylla.
