Imphal, Jymmang 18: Ha ka sienjam ban kdiah ia ka jingtreikam bapher bapher jong ki kynhun kaikhlaw, ki bor pahara ha Manipur kila ioh ban kem haduh khyndai ngut ki ehrang kiba dei na ki kynhun kaikhlaw bapher bapher kiba la shah niew beain tang hapoh 24 kynta.
La ioh ban kem ia kine ki khyndai ngut, kadei ha ka jingkhynra kaba la pynlong ha ki san tylli ki district ba kynthup ha Imphal East, Imphal West, Churachandpur, Thoubal bad ha Bishnupur district.
Kine ki kaikhlaw kiba la shah kem kidei kiba don ha ka seng Kangleipak Communist Party (KCP), People’s Revolutionary Party of Kangleipak (PREPAK), Chin Kuki National Defence Force (CKNDF), bad ka United National Liberation Front (UNLF).
Napdeng kine kiba la shah kem ki kynthup ia u Thongkhohou Touthang (34) snem ka rta uba dei u dkhot jong ka CKNDF uba dei ba donkti ban pynrung ia ki khun samla sha ka kam kaikhlaw bad uba iarap ruh ban iarap ban rung ban mih ha khappud bad kumjuh ruh ban pynpoi ia ki tiar siat sha ki dkhot.
Ha kane ka jingkhynra ki pulit kila ioh ban kurup ia ki tiar naduh ki suloi, ki kuli, ki Aadhaar cards ki kot ki sla bad kumjuh ia kiwei de ki tiar.
“Ngi lah kem haduh khyndai ngut ki kaikhlaw tang hapoh 24 kynta bad baroh kiba la shah kem mynta kila long haduh 38 ngut kiba dei na ki seng bapher bapher tang ha kine ki saw sngi kiba la leit” ong u heh ophisar Pulit.
Hadien ka jingpynjari ia ka President’s Rule naba mih ka jingiakynad kaba poi shaduh u pud jong ka jingia um snam, ki bor pahara ki dang pynkhlain shuh ia ka jingiakhun ban pynduh jait ia ki kam kaikhlaw hapoh ka jylla.
