Guwahati, Lber 22: Da ka jingthrang ban wanrah biang ia ka shongsuk shongsain hadien ba la mih ka jingiakynad jaidbynriew ha jylla Manipur, u Myntri Rangbah ka Jylla Yumnam Khemchand Singh ha ka sngi Saitjain u la pynlong ia ka jingialang bad ki nongmihkhmat ki kynhun Kuki ha Guwahati.
Ia kane ka jingialang kaba la batai da ki heh sorkar kum ka jingpynskhem ia ka jingshaniah, ka la long ha kawei ka hotel ha ka nongbah, ha kaba u Myntri Rangbah u la kyntu ia ki nongialam shnong ba kin shim ia ki sienjam kiba tei ban pynioh biang ia ka jinglong jingman kumba ju long hapoh ka jylla.
Naduh ba u la shimti ïa ka kam, u Singh u la ïatreilang bad ki nongïadon bynta lang ha ka jingpyrshang ban pynduna ïa ki jingïakynad bad ban tei pat ïa ka jingshaniah hapdeng ki jaidbynriew kiba shah ktah ha ka jingïakynad jaitbynriew kaba la slem bha.
“Ki nongmihkhmat na ki kynhun Kuki ki la iakren bad u Myntri Rangbah ka Jylla.Kane ka dei ka sienjam ban pynskhem ia ka jingshaniah.U CM u la kyrpad ia ki jaidbynriew Kuki ban trei na ka bynta ban wanrah pat ia ka jingsuk ha Manipur”, la ong uwei u heh sorkar.
Ki tyllong khubor, ki la pynpaw ba dang shen ka jingïakynad ka la nang jur hapdeng ki kynhun Thangkhul (Naga) bad ki kynhun Kuki ha ki katto katne ki jaka, kaba la pynmih ïa ki jingsngewkhia kiba thymmai ïa ka sorkar jylla.
Ka Manipur ka la ïakhun pyrshah ïa ka jingshah thombor jong ki jaitbynriew naduh u bnai Jymmang jong u snem 2023, khamtam eh hapdeng ki jaitbynriew Meitei bad Kuki, kaba la wanrah ïa ka jingduhnong kaba khraw bad ka jingshah pynkynriah jaka kaba heh.Ha kaba da ki hajar ngut ki la kylla long kiba khlem ïing khlem sem, bad katto katne ki jaka ki dang ïai bteng ban sah ha ka jingeh.
Ki heh sorkar ki la kdew ba ki jingïakynad kiba la mih hapdeng ki kynhun Kuki bad ki Naga ki la pynjynjar shuh shuh ïa ka jingïasuk,kaba la pynlong ïa ka sorkar ban pynjur ïa ki jingpyrshang jong ka ban pynbeit.
Ka jingïakynad hapdeng ki Kuki bad ki Naga, kaba la sdang ha ki snem 1990, ka la mih na ka jingïakynad halor ka jaka, ka jinglong kyrpang, bad ki jingkam ha ka saiñ hima sima, khamtam eh ïa ki jingdawa jaka kiba ïatyngkhuh kiba ïadei bad ka jingmut jong ka “Greater Nagalim.” Ka jingshah thombor ha kata ka por ka la pynlong ia palat 1,000 ngut ki briew ban iap bad ka la pynlong ia kiba bun ban phetwir.
Da ki jingpyrshang ba thymmai kiba dang iaid shakhmat, ka sorkar jylla ka kyrmen ba ka jingiakren bad ka jingiatreilang kan iarap ban iada na ka jingjur shuh shuh bad ka jingplie lad ia ka jingsuk kaba neh shyrta.
