Guwahati, Naitung 29 : U Myntri Rangbah ka Manipur N Biren Singh, ula iakynduh ia u Myntri Rangbah Duh Narendra Modi ha ka sngi U Blei, ha ka jingleit jong u sha Delhi bad ula iakren halor ka jinglong jingman ka suk ka sain ha Jylla naduh ba khie ka kam umsnam pher Jaidbynriew.
Kane ka dei ka jingiakynduh ba nyngkong eh hapdeng kine ki arngut naduh ba khie ka thma iapher Jaidbynriew hapoh ka Jylla kaba la iaid palat 14 bnai.
Ha kane ka jingialang la iadonlang ruh u Myntri kam Pohiing ka Ri Amit Shah bad u Myntri iada Ri Rajnath Singh.
U Singh, uba don ha Delhi ha kine ki arsngi, ula iakynduh nyngkong ia u Modi ha ki artylli ki jingialang jong ka NITI Aayog bad ka jingialang ki Myntri Rangbah bad Symbud Myntri Rangbah ki Jylla ba synshar ka BJP.
Ka jingiakynduh u N Biren Singh ia ki Nongialam ka BJP ka pyni ia ka dak ba ki nongialam ka Party ki lah ban nym pat don satia ia ka jingthmu ban bujli ia u da ka dur thymmai ban ialam ia ka Sorkar ha kane ka Jylla.
Ki paidbah ha Manipur bad kumjuh ruh ki Liang Pyrshah kila buh jingkylli ia ka jingsngap jar jar jong u Modi halor ka jingjia ha Manipur ha kine ki shisnem bala leit. Ka Congress kala jop ia baroh artylli ki Lok Sabha seat ha ka Jylla ha ka elekshon Lok Sabha ba dang shu dep.
Haduh 221 ngut ki briew kila iap bad palat 60,000 ngut kila kylla phetwir naduh ba khie ka thma iapher Jaidbynriew hapdeng ki Kuki-Zo bad ki Meitei, kaba la khie naduh ka 3 tarik Jymmang, 2023.
