Guwahati, Nailur 02 : Ka Sorkar Manipur kala hukum ia u Khliehduh ki Pulit ban pynlong ia ka jingkhynra kaba jur pyrshah ia ki kynhun kaikhlaw hadien ka jingmih ka jingiather kuli hynne ka step por 5:30 ha ka thain kaba don hapdeng ka Imphal West District bad ka Kangpokpi District.
“Ka dei ka jinghiar thma kaba jur bha ha Kautruk, da ki kynhun kaikhlaw Kuki kiba la siat da ki rocket RPG lyngba ki high-tech drone” ong ki Pulit ka Manipur ha ka kyrwoh.
Kila bynrap “Ki bor Sorkar kila peitthuh bha ia ka jinglong jingman bad la suba ia ka jingdonkti jong ki briew kiba la hikai pyntbit bha ban pyndonkam ia ki kor ki bor ka juk. Ki Pulit kila pynkhreh bha ialade lada mih kano kano ka jingjia”.
Uwei u Heh Pulit ula iathuh ba ki drone kila pynhap ia kumba 7 tylli ki bomb sha ki iing ha Koutruk, kaba don ha ki kjat lum ka thain Shatei Lam Sepngi ka Imphal.
Ki video ba ring ha Koutruk kila wan hynne ka step ba pyni ia bun tylli ki iing bad ki kali, kila shah wiang ding ha ka miet sngi U Blei.
Ki Nongshongshnong jong ka thain kila hap ban leit riehtngen ha ki skul. Kila iathuh ha ki lad pathai khubor ba ka rukom hiar thma ka long ban pynbor ia ki nongshongshnong ba kin phet nala iing da kaba ther kuli naphang hashuwa ba kin wiang ding ha ka por mynmiet.
U Director General of Police (DGP) ula hukum ia baroh ki District Superintendent of Police ba kin peitngor bha bad ban sdang pynlong ia ka jingkhynra ha ki jaka them.
Ha kane ka jingther kuli ki kaikhlaw Kuki ha Koutruk hynnin ka sngi U Blei, kawei ka Longkmie ba 31 snem na ka Jaidbynriew Meitei kala iap. Ka khun ba dang 12 snem ka dei kawei napdeng ki 10 ngut kiba mynsaw kynthup ia 2 ngut ki Pulit bad uwei u TV reporter.
