Imphal, Nailar 04: Ki paidbhur kila hiar thma kynsan kynsan ia artylli ki police Outpost ha Bishnapur District ka Manipur bad rong tuh ia bun bah ki tiar siat bad ki kuli.
Kane ka jingjia kala jia ha ka janmiet sngi Palei, ong ki Pulit kiba pyntip ruh ba uwei u Pulit ula shah pyniap ha Koutruk, Bishnapur District n aka jinghiar thma ki riewkiengatiar kaba lam sha ka jingiather kuli bad ki bor pahara.
Kat kum ka kyrwoh na ka Tnad Pulit ha ka miet sngi Palei la ong ba ki paidbhur kila thombor kynsan kynsan ia ka Keirenphabi Police Outpost bad ka Thangalawai Police Outpost jong ki Pulit 2nd Battalion bad kila ioh rong ia bun bah ki tiar siat bad ki kuli.
Kine ki paidbhur ba kynthup bad shynrang bad kynthei kila pyrshang ruh ban leit knieh ia ki suloi bad ki kuli na Heingang Police Station bad Singjamei Police Station kiba don ha kajuh ka District hynrei ki bor pahara kila lah ban beh krad iaki.
Ha kawei pat ka jingjia, ka jingiather kuli kaba jur kala mih hapdeng ki riewkiengatiar bad ki bor pahara ha ka thain Koutruk, Haraothel bad Senjam Chirang ha kaba arngut ki briew kynthup uwei u Pulit ula mynsaw ba shei kuli bad une u Pulit ula iap noh hadien.
La iathuh ba ha kine ki 24 kynta bala leit noh, ki paidbhur ba don kumba 500-600 ngut kila ialumlang ha Phougakchao Ikhai kaba don ha khappud ka Bishnapur bad Churachandpur District hynrei ki bor pahara kila leit beh krad da kaba siat da ki tyndong lyer pynsat khmat kaba lam sha ka jingmynsaw haduh 25 ngut ki briew.
Pule ruh: Assam: Dawa u MLA barim ka BJP ban khein be-ain ia ka jingleh Azaan ha ki Mosque
