Imphal, Naitung 31 : Palat 1000 ngut ki Kynthei ha ka sngi Nyngkong, kila pynlong ia ka jingiakhih ha Churachandpur ban dawa weng noh mardor ia ki Pulit ka Jylla na sor Moreh.
Kine ki Kynthei kila byrngem ruh ban pynlong ia ka jingiakhih kaba tyngeh ha baroh ki Hill District lada ka Sorkar kam pynurlong ia ka jingdawa jong ki.
Ha ka 28 tarik Naitung, da ki hajar ngut ki Kynthei Kuki-Zo ha Tengnoupal District kila khang ia ka surok sha Moreh kaba don ha khappud ka Moreh, ban khang lynti ia ki Pulit ba kin rung shapoh ka sor.
Ka kynhun ba 10 tylli ki kali jong ki bor pahara kynthup ki Indian Reserve Battalion, Manipur Rifles bad ki Commando kila leit sha sor Moreh ban pynlong jingkhynra hynrei ki Kynthei kila khang lynti ia ki ha Tengnoupal.
Kane ka jingiakhih ki Kynthei ha Churachandpur kala jia hadien shisngi ba ka kynhun ki MP ka I.N.D.I.A kila ong ba lada ia kane ka jingiakynad ha Manipur ym lah ban pynbeit noh shen, ka lah abn wanrah ia ka jingkulmar hapoh ka Ri baroh kawei.
Kane ka kynhun synrop ki Liang Pyrshah, kila leit sha Manipur naduh ka sngi Saitjain, kila ther tyngeh ia u Myntri Rangbah Duh Narendra Modi halor ka jingsngap jar jar bad leh bym suidniew ia ka jingiakynad pher jaidbynriew ha kane ka Jylla ka thain Shatei Lam Mihngi.
“Lada ym lah pynbeit noh kloi ia ka jingiakynad ha Manipur, ka lah ban pynkha ia ka jingbym shongsuk hapoh ka Ri baroh kawei” ong u Nongialam ka MP ha Lok Sabha Adhir Ranjan Choudhury, uba dei uwei na ki dkhot ka kynhun.
Ha ka dorkhas bala aiti sha ka Lat ka Manipur Anusuiya Uiker, ki 21 ngut ki MP ka I.N.D.I.A kiba la soi ia ka dorkhas, kila dawa ban ai jingiarap kyrkieh bad jaka sah ia ki briew kiba shah ktah khnang ban lah wanrah pat ia ka jingsuk jingsain hapoh ka Jylla.
“Na ki khubor ba iasiat khlem sangeh bad jingwiang ding ia ki iing ki sem ha kine ki khyndiat sngi, la pynthikna khlem ka jingartatien ba ki bor Pulit ka Jylla kim lah satia ban tehlakam ia ka jinglong jingman mynta la lai bnai tam” ong ka dorkhas.
Palat 160 ngut ki briew kila iap bad da ki spah ngut kila mynsaw na ka thma iapher Jaidbynriew kaba la khie ha Manipur naduh ka 3 tarik Jymmang hadien ka jingiaid rally ki paid riewlum ban pyrshah ia ka jingdawa ki jaidbynriew Meitei ban ai jingithuh kum ki Schedule Tribe ka Jylla.
Ki Meitei ki don kumba 53% u paid na ka jingdon paid ha Manipur bad ki dei kiba um bun eh ha Imphal Valley. Ki paid riewlum ba kynthup ia ki Naga bad Kuki ki don palat 40% bad ki sah sha ki Hill District.
