Imphal, Nailur 02: Ka Kuki-Zo Council (KZC) ka la dawa biang sa shisien ban pynjari noh da ka President’s Rule ha Manipur, haba buh jingkylli ia ka rai jong ka Sorkar Pdeng ban pynkynriah shwa ia ka jinglum khana sumari kaba dang iaid shakhmat hapoh ka jylla.
Ha ka kyrwoh, ka KZC ka la ong ba ki jaitbynriew Kuki-Zo ki kham sngew shngain hapoh ka jingsynshar jong ka Sorkar Pdeng ban hapoh ka jingsynshar ka Sorkar Jylla bad ka la kynnoh ba ka Sorkar Jylla kam shym la lah ban pynthikna ia ka jingshngain iaki nong shong shnong.
Kane ka jingdawa pynjari President Rule kala wan shisngi ba ka Sorkar Pdeng ka la mynjur ban pynsangeh noh shwa iaka jinglum khana sumari 2027, kaba la thmu ban sdang ha ka 1 tarik Nailur ha Manipur.
Iaka rai la shim haka jingïalang ha New Delhi ba la pynïaid da u Myntri ka tnat kam pohïing ka Sorkar Pdeng u Amit Shah haka jingdonlang u Union Home Secretary Govind Mohan, u Lat ka Jylla u Ajay Kumar Bhalla bad u Myntri Rangbah u Yumnam Khemchand Singh.
Ka ophis u Myntri Rangbah ka jylla ka la ong ba haka jingialang la shong bishar ia ki jingdawa jong ki 14 tylli ki seng bhalang kiba mihkhmat ia ki jaitbynriew Meitei bad Naga na ka bynta ka “No Census Before NRC”.
Ia kane ka jingpynkynriah iaka jinglum khana sumari la leh kum ka jingburom ia ka jingsngew bad jingangnud jong ki paidbah ka Manipur.
Hynrei ka KZC ka la buh jingkylli halor kane ka rai.
“Ym shym la don kawei ruh ka seng bad mihkhmat iaki jaidbynriew Kuki-Zo ha kane ka jingdawa hynrei iaka rai la shim daka ba ong ba kadei bad ka jingsngew bad jingangnud jong ki paidbah ka Manipur” la ong ka Council.
Ka la pynskhem ba ia ki rai kiba ktah ia ki jaitbynriew Kuki-Zo ym lah ban khein ba ki long kiba dei haba ia ka jaitbynriew namar ym shym la kynthup lang iaki haba shim ia kane ka rai.
Ka jingpynkynriah ïa ka jinglum khana sumari kadei kawei pat ka bynta ba pynïapher ha ka saiñ hima sima jong ka Manipur.
Ki kynhun naka jaidbynriew Meitei bad Naga ki la dawa iaka NRC hashuwa ban leh iaka khana sumari da kaba kdew ïa ka jingsngewkhia halor ka jingkynnoh ba ki wan buhai shnong beaiñ na Myanmar.
Hynrei ka KZC ka la batai baka NRC shwa ja khana sumari ka long kaba khlem nongrim, da kaba kynthoh ba dei ban pynskhem shwa ia ki jingtip kiba thikna shaphang ka jingbun briew lyngba ka jinglum khana sumari.
Ka Council ka la buh jingkylli ruh halor ka jingshim bynta jong u Myntri Rangbah barim ka Jylla u N Biren Singh ha ka jingïalang ha New Delhi, da kaba ong ba ka jingwan jong u ka buh jingkylli halor ka jingbym shim liang jong ka jingbishar.
Ka KZC mynshwa ka la kynnoh ïa u Biren Singh ba u pynlong ïa ki kam thombor pyrshah ïa ki jaidbynriew Kuki-Zo.
Kane ka jingkynnoh ka long hapdeng ka jingïakynad kaba dang ïai bteng ha Manipur, kynthup ruh ïa ki jingïakynad kiba jur hapdeng ki kynhun Naga.
Ka KZC ka la ong ba ka la kyrmen ba ka jingweng noh ïa ka President’s Rule bad ka jingthaw ïa ka Sorkar thymmai kan wanrah ïa ka jingshngaiñ bad ka jinglong kaba thikna, hynrei ka la kynnoh ba ki jingshah thombor bad ki jingshah pynïap briew ki la ïai bteng.
Ia ka President’s Rule la pynjari ha Manipur ha u bnai Rymphang 2025 hadien ka jingiehnoh kam u Biren Singh bad la weng noh ia ka ha u bnai Rymphang 2026 hadien ba u Yumnam Khemchand Singh u la shimti ia ka kam kum u Myntri Rangbah ka Jylla.
Ka KZC mynta ka pynbor ia ka Sorkar Pdeng ban wanrah biang iaka President Rule da kaba kynthoh ba ka jingsynshar ki seng sain pyrthei kim shym la lah ban ai ia ka jingshngain, ka hok bad ka burom iaki nong shong shnong kynthup iaki jaitbynriew Kuki-Zo.
Ka Council ka la pynpaw biang ruh ïa ka jingdawa kaba la slem bha ban don ka jingpynbeit kyrpang ha ka saiñ hima sima ban ïada ïa ka jingshngaiñ jong ka imlang sahlang, ka khyndew ka shyiap bad ka jinglong kyrpang.
