Imphal, Nailur 03 : Ka Kuki Inpi Manipur(KIM) kala pynbnaban phiah ia ka bor synshar lajong ia ki Kuki bad ki Meitei hadien ki 24 ngut ki Volunter ka Kuki ha New Lambulang, Imphal, kila shah ialam noh sha ka jaka ba shngain ha ka 1 tarik u Nailur.
Ka KIM kaba dei ka synjuk ba khlain duh ki Jaidbynriew Kuki, kila dawa ban phiah noh ia ka bor synshar ia ki Kuki na Manipur.
Ka thma iapher jaidbynriew hapdeng ki Meitei bad ki Kuki naduh ka 3 tarik Jymmang 2023, kala pynjngai bah ia ki jaidbynriew Kuki na ki Meitei.
Ka KIM ka pynrem jur ia ka jinghiar thma pyrshah ia ki Volunteer Kuki ba khadduh eh kiba don kumba 24 ngut, kiba la ieng iada iala ki iingbad nongkynti jong ki Kuki ha New Lambulane, Imphal, na ka jingthmu wiang ding bad lute jong ki Meitei.
La pyntip ba ki bor shipai kila leit iarap ia kine ki volunteer ba kila ialam noh ia ki sha ki jaka ba shngain wat hapdeng ka jinghiar thma ba shyrkhei jong ki Meitei.
“Namar kata, ka Kuki Impi Manipur, ka pynbna ba mynta kala don ka jingiaphiah ia ki Kuki bad ki Meitei. Ka dei eh ia ka Sorkar Pdeng ban ai jingithuh noh ia kane ka jingiaphiah kham kloi khlem da pynslem shuh” kala ong.
Haduh 150 ngut ki briew kila iap bad palat 400 ngut kila mynsaw na kane ka kam iaumsnam kaba la sdang naduh u bnai Jymmang.
Palat 60,000 ngut ki briew kila hap ban phet nala ki jong ki Iing ki sem katba ki shipai bad ki bor pahara ki dang ialeh ban tem ia kane ka kam iaumsnam.
