Guwahati, Naiwieng 18: Haduh 10 tylli ki seng sain pyrthei ka Manipur ha ka sngi Thohdieng, kila aiti da ka dorkhas sha ka Lat ka Jylla Anusuiya Uikey, ba pynpaw ba tang u Myntri Rangbah Duh ka Ri uba long ka jingkyrmen ban wanrah pat ia ka jingsuk hapoh ka Jylla.
Kane ka dorkhas kala kyrpad ruh ia ka Lat ba kan pynbeit ia ka jingialang jong baroh ki seng sain pyrthei ka Jylla bad u Myntri Rangbah Duh ka Ri.
Ha ka dorkhas, ka Liang Pyrshah kala kyntu jur ia ka Lat ba kan pynbeit ia ka jingialangjong baroh ki seng sain pyrthei lem bad u Myntri Rangbah Duh ka Ri khnang ban iawad ia ki lad ki lynti ha kaban pynkut noh ia ki jingiakajia da ka jingialam lynti bad jingai buit jong u.
Haba jubab ia ka dorkhas, ka Lat kala kular ba kan sa iakren bad u Myntri Rangbah Duh ban pynlong ia kane ka jingiakren bad ki seng sain pyrthei.
Kine ki seng sain pyrthei ki kynthup ia ka MPCC, JDU, CPI, CPI(M), AAP, RSP, NCP, SS(UBT), AIFB bad AITC.
