Imphal, Nailar 11: Haduh 40 ngut ki MLA kila aiti ia ka dorkhas sha u Myntri Rangbah Duh ka Ri Narendra Modi ha ka sngi Palei ba dawa ban weng noh mardor ia ki shipai Assam Rifles na Jylla Manipur.
Ka dorkhas ka ong ba ki shipai Assam Rifles kiba don hapoh ka Jylla ki dei ia kaban weng noh bad ban bujli ia ki da ki shipai kiba lah ban shaniah.
Kine ki MLA Meitei kila kdew ruh ba katba ym lah lah ban pynduh ia ka jingkiengatiar, ka shongsuk shongsain kan ym kut satia hapoh ka Jylla.
Kine ki MLA kila ongba ki tiar siat bala pyndonkam da ki kynhun kaikhlaw ki dei kiba khlain bor bha ba kynthup ia ki Assault Rifles, Sniper Rifles bad ki Rocker Propelled Grenade. Ha kiba bun ki khep, ki jingjia ther kuli kala jia ha ka jingia don ryngkat ki bor shipai, ki bym shym la lah ban pynphai kylliang kumba ki dei ban leh. Kane kala lam sha ka jingduh jingshaniah ia kine ki shipai bad pynbitar ia ki paidbah.
Ki MLA kila ong ruh ba ka jingnang jur ka jingbym shaniah ia kine ki shipai kala paw ruh na ki video kiba la saphriang kylleng ki jaka lyngba ki rynsan social media.
Hadien ba kawei ka video kala mih paidbah, ki Pulit ka Manipur kila register ejahar ha ka sngi nyngkong pyrshah ia ki shipai Assam Rifles. Ha kane ka video, la iohi ba ki Pulit ka Jylla kila iania bad ki shipai Assam Riles haba kynnoh ba ki ai jingiada ia kawei ka liang.
Pule ruh: Assam: Iap 4 ngut katba dang pynkhuid ia ka tanky buh kyiad ha Tinsukia
