Shillong, Rymphang 01 : Ka Sorkar Meghalaya kala pynpaw ia ka jingsngewnguh ia ka mang tyngka 2026-27 jong ka Sorkar Pdeng, kaba la wanrah da ka Myntri Pla Tyngka, haba niew ia ka “kum ka jingkhmih lypa ia kaei kaba shakhmat bad ka lynti iaid kaba don jingmut” na ka bynta ka roi ka par ka ri India.
“Ka Mang Tyngka ka buh ïa ka lynti kaba khmih lypa ia kaba shakhmat bad ka lynti kaba don jingmut ha ka lynti iaid jong ka ri India sha ka Viksit Bharat, kaba la pynskhem bha ha ka jingstad ha ka rukom pyniaid ia ka pisa tyngka, ka jingbei pisa kaba iai neh, ka jingroi ba kynthup lang ia baroh bad ka roi ka par ba biang tarajur jong ka thain” ong u Joint Secretary ba khmih ia ka Tnad Finance.
Ka Sorkar ka pdiang sngewbha ia ka jingpynheh ia ka jingai song pisa ba T.1.85 klur hapoh ka Special Assistance to State for Capital Investment (SASCI), haba ong ba kane kan nang pynkhlain ia ka roi ka par kat kum ka jingdon pisa bad ka jing nang roi ki jingtei hapoh Meghalaya.
Hynrei, ka Sorkar Jylla ka pynpaw ia ka jingsngewkhia halor ka jingpynkylla ha ki kyndon sam bhah, kaba la pynduna ia ka bhah ka Meghalaya na ki khajna ka Sorkar Pdeng. Ka jingnang pynshong nongrim ha ka jingdon briew (2011), ka jingpynbeit biang ia ka jingiapher ha ka ioh ka kot ka Jylla na ki Jylla ba hehduh ka ioh ka kot (income distance), ka jingbuh kyndon thymmai halor ka synniang sha ka GDP, kila wanrah ia ka jingktah kiba pher ia ki Jylla kiba rit bad ba ithuh kyrpang.
“Ia ka Jylla lum kum ka Meghalaya, kaba iatip ia ki jingeh n aka rukom long jong ki jaka…..kine ki jingpynkylla kila wanrah ia ka jingeh ha ka jinglah theh pisa ka Sorkar” bynrap ka kyrwoh.
Na ka bynta u snem 2026-27, ka Meghalaya kala ioh ia ka song pisa ba T.190 klur kum ka Grant sha ki bor synshar ha ki jaka nongkyndong, T.49 klur kum ka grant sha ki bor synshar ha jaka sor, T.63 klur sha ka State Disaster Response Fund bad T.16.20 klur sha ka State Disaster Mitigation Fund.
Haba iaroh shuh shuh ia ka jingpynbeit jingmut jong ka mang tyngka ka Sorkar Pdeng sha ka thain Shatei Lam Mihngi, u Joint Secretary ula ong “Ka mang tyngka ka Sorkar Pdeng ka iai ban ia ka polisi kaba shai ba pynleit jingmut ha ka thain Shatei Lam Mihngi, haba ithuh ia ka jinglong kongsan jong ka thain, ka rukom long ka mariang bad ki lad kyntiew ia ka ioh ka kot ki bym pat pyndonkam”.
Ki sienjam ba kongsan kum ka T.10,000 klur SME Growth Fund, ka jingpynroi ia ki jingtei, bad ka jingkyntiew ia ki kam jngohkai la khmih lynti ba kin nang kyntiew ia ka Meghalaya bad kumjuh ruh ia ka iohkam iohjam.
Ka Sorkar Jylla kala pynpaw ruh ia ki jingmyntoi ba ka ioh ha ka liang ka pule dangle, ka koit ka khiah, ka rep ka riang bad ka jingpynkupbor ia ki Divyangjan.
