Shillong, Lber 05 : U Myntri Rangbah ka Jylla Conrad K Sangma ha ka sngi Balang ula ong ba ka Sorkar MDA kala lah ban pynurlong ia ka jingkylla ha ka ioh ka kot ka Jylla Meghalaya bad ki nongshongshnong naduh u snem 2018.
Haba wanrah ia ka mang tyngka ha ka sien ba phra, u Conrad ula ong “Ngi la kynnoh ia ka 11% ka jingkiew ha ka ioh ka kot ha kine ki 7 snem bala leit noh. Kane ka jingkiew kala urlong da ka jingpyniar ia ka jingkynshew pisa namar ka jingnang ioh bun ka bhah khajna na ka Sorkar Pdeng bad ka jingpynmih khajna nala Jylla, ka jingpyntrei bha ia ki scheme ba bei da ka Sorkar Pdeng, ki Externally Aided Project (EAP), bad ki skhim thymmai kum ka Special Assistance to States for Capital Investment (SASCI)”.
U pyntip ia ka Iingdorbar ba hashuwa u 2018, ki jingkhein halor ka ioh ka koit ka Meghalaya bad ka roi ka par haba ia nujor ruh bad kiwei ki Jylla ka thain Statei Lam Mihngi ka pyni ka por hapdeng u snem 2010-2018 ka dei ka por ba eh bha ha ka pla tyngka ka Jylla.
Ula ong ba ka Jylla ha ki snem bala leit kam shym la lah ban kynshew pisa ba donkam ha kiba bun ki kam kum ha ka koit ka khiah, ka pule dangle bad ruh ki jingtei ba kongsan kum ki surok, ka jingpynbiang umbam umdih bad bording hynrei mynta kine kiei kiei baroh kila kylla lut naduh u snem 2018 hadien ba shimti ka Sorkar MDA.
“Kum ka nuksa, haba khein ia ka jingiapher jong ka Multi-dimensional Poverty Index (MPI) ka Assam bad Meghalaya ka pyni ba kumno kine ki ar jylla ki don ia kajuh ka jingkhein halor ka jingduk haba sdang jong une u snem bad kumta ka Assam kala lah ban pynduna ia ka MPI da 13% katba ka Meghalaya kala lah pynduna tang da 4.8%” ula bynrap.
Ula pyntip ba wat hapdeng ka jinglynshop ka khlam Covid, ka Jylla kala lah ban pynbeit janai ia ka pla tyngka, pynjanai ia ka synshar khadar bad pynkhlain bha ia ka jingai jingshakri, iada ia ka hok jong ki paid trai ri, pynneh ia ka shongsuk sjong sain bad ban kynshew pisa ha kiba bun ki tnad treikam ban wanrah ia ka jingkylla.
“U soh jong kine ki jingkynshew kila paw mynta ha ki kam kum ka koit ka khiah, ka jingpynbiang umbam umdih, ka kam jngohkai, ka jingpynkupbor ia ki kynthei, ki nongsengkam, IT bad ka bording. Hynrei ki jingkhein ha ki kam kum ka kam rep, pule dangle bad pynbiang jingbam tei met ki dei kiba dang shimpor ba kin kylla. Ka Sorkar kala kut jingmut ban trei shitom bad pynkhlain ia ka jingiatreilang ban pynthikna ia ka jingpynjanai ha baroh ki thong ka roi ka par kaba neh” ula ong.
