Shillong, Jylliew 17 : Ka Sorkar Jylla kala mang T.7.3 klur ban pynwandur itynnad bad ban pynkhuid ia ki ahor bad ki jaboh jabain hapoh ka pung Nan Polok ban nang kyntiew shuh shuh ia ka kum kawei na ki jaka shangkai pyrthei.
Haba pyntip ia kane ha ka sngi Ba-ar, u Myntri ka Tnad Jngohkai Bah Paul Lyngdoh ula ong “Lyngba ka Tnad Urban Affairs, nga sngewkmen ban pyntip sha phi ba la dep ban mang T.7.3 klur ban pyntrei ia ki kam ban pynwandur itynnad ia ka Nan Polok. Kane ka jingpynitynnad kan kynthup ia ka jingpyn khuid ia ka um”.
“Haba phai sha ka jingnang kyntiew ia ka Nan Polok kum ka jaka wanshangkai, ngin pyniaid shakhmat bad ka jingpynkhuid ia ka Nan” ula bynrap.
U Myntri ula pyntip ba ka Tnad kala dep ban pyllait ia ka Notice Inviting Tender (NIT) bad ha kine ki artaiew ban wan, ka kam kan sa sdang noh.
“Shisien bala sdang pyntrei ia ka kam, ka jingpynkhuid bad jingpynitynnad ia ka Nan Polok, phin sa iohi hadien bala dep lut ki kam ba ka um kan sa khuid phlir phlir bad ka jingpyndonkam ia ki technology kum ka Nano Bubble, kan iarap ban pyndon oxygen ha ka Nan” ula ong.
U Myntri ula pynbna ruh ba sa T.4 klur la dei ban mang ban pyntrei ia ka Lights and Sound show ha Nan Polok.
“Shuwa ban kut ka aiom lyiur, ngi dei ruh ban lah pynsdang noh ia ka light and sound show ha Nan Polok bad ka pisa bala mang ka long T.4 klur bad ka kam khot tender ia ka project kan sa long noh shen. Ki kam ki ban pyntrei kin sa sdang hashuwa ban kut u Nailar lane Nailur. Kane ka project kan shimpor kumba 6-8 bnai tad haduh ban dep” ula ong.
Nalor kane, u Bah Paul ula ong ba ka Sorkar kan sa pyntrei ruh ia ki painkhana ban pyndonkam ki paidbah ha ki 10-12 tylli ki jaka shangkai.
“Kumba 10-12 tylli ki jaka lah dep ban ithuh bad ia kine ki painkhana la mang ban pyntrei ha ka jing lut ba kot T.25 lak kawei” ula bynrap.
