Shillong, Naiwieng 25 : Ka Sorkar Jylla kala mang ia ka song pisa ba T.500 klur ban pyntrei ia ka New Shillong Township Water Supply Scheme.
Haba pyntip ia kane ha ka sngi Nyngkong, u Myntri ka PHE Marcuise N Marak ula ong “ Ia ka New Shillong Township Water Supply Scheme, ngi la dep pyllait ia ka tender ba kot kumba T.500 klur. Ngi la dep ai ia ka work order bad ka kam kala sdang iaid”.
Halor ka jingsngewkhia jong ki contractor trai jylla, u Marcuise ula ong ba kan long kaba eh ban ai kam lang ia ki contractor trai jaka lada ka Sorkar ka pyntreikam ia ki kor ki bor ba thymmai ka juk ha ba pyntreikam ia kum kine ki project.
“Ngi iatip bha ia ki kam kiba donkam da ki contractor jong ngi ruh hynrei na ka bynta ka synshar khadar kaba biang bad na ka bynta ka lawei jong ka Jylla jong ngi, ngi hap ban iaid kat kum ki kor ki bor ka juk bad lada ngi iaid kat kum kine ki kor ki bor thymmai, kan long kaba eh ban aikam lang ia ki contractor trai jylla” ula ong.
“Ngi la pyndonkam ia ki kor ki bor ka juk mynta. Ngi la pyndonkam ia ka Skada System ia ka NST ha kaba ka Internet kan treikam haba bthei ki pipe, ka ban pynsuk ia ki Nongtrei ka PHE ban lap bad leh ia kaba donkam khlem ka jingpynslem. Ta ka daw ngi donkam ban pyndonkam ia kine ki kor ki bor ka juk kaba ki contractor jong ngi kim pat don ia ka jingnang jingtip” bynrap u Myntri.
Haba kylli, u Marcuise ula ong ba ka Tnad kala buh ia ka jingtyrwa ban ioh jingmynjur na ka Kynhun Myntri ban leh eiei halor ki jingeh ba iadei bad ka jingsam ia ka umbam umdih ha Sor.
“Ka PHE ka dei kaba peit ia ka jingsam um ba bun bad ka SMB ruh ka don bynta ha ka jingsam um. Ngam lah ban ong eiei halor ka rukom pyniaid ia ka jingsam um. Naba bun kiei kiei kila mih, ngi hap ban iakren bad u Myntri Rangbah bad u Myntri ka Tnad Urban Affairs, ngi la pyrshang ban wanrah ia ka rukom treikam ba thymmai la ka dei kaba lah pyntreikam ne em, kane kan dei ka kam kaban sa iakren hapoh ka Kynhun Myntri. Kum u Myntri ka PHE, nga la buh ia kine ki kam hakhmat u Myntri Rangbah bad u Myntri ka Urban Affairs. Lad aka Kynhun Myntri kala pdiang, ngan sa lah ban batai ia phi shaphang ka rukom treikam kaba thymmai” ula ong.
