Shillong, Rymphang 23 : U Symbud Myntri Rangbah ba khmih ia ka Tnad PWD (Roads & Building) Bah Prestone Tynsong ha ka sngi Thohdieng, ula pyntip ha Iingdorbar bka pisa ba T. 50 lak lah mang ia kawei pa kawei ka District ba kin pynbha bad maramot ia ki Police Quarter bad ki Barrack.
Haba jubab ia ka jingkylli bala wanrah da u MLA ka Congress na Gambegre Saleng A Sangma, u Bah Prestone ula ong “Ngi la dep ithuh ia ki jingtei kiba la jot. Ha une u snem mang tyngka ba mynta, ka Sorkar Jylla kala mang T. 50 lak ia kawei pa kawei ka District ba kin lah ban tem ia kane ka jingeh”.
“Nga kular ia kane ka Iing ba ngin nang pynkhlain bad pynthikna ba ka jaka sah jong ki Pulit kan dei kaba biang” ula bynrap.
U Bah Prestone ula pyntip ruh ba ha une u snem, kila bun ki jingpynkylla kila la jia ha ka Tnad Pulit.
“Hadien ba ngi la iohi bad sngewthuh ba kane ka dei kaba donkam, ngi la thaw ia ka Engineering Wing la ka jong, kaba la treikam pura mynta” ula ong.
