Shillong, Rymphang 23 : U Myntri Rangbah ka Jylla Conrad K Sangma ha ka sngi Nyngkong, ula pyntip ha Iingdorbar Thaw Ain ba ka project ba kot T.50 klur lah dep ban ai jingmynjur hapoh ka Police Housing Scheme, bad T.25 klur lah dep ban pynlait bad ka kam mynta kala iaid ha ki 40 tylli ki jaka.
“Ka Tnad Pulit…kala shah ieh bha bad ngi la wanrah ia kane ka song pisa ha kaba ngi la ai ia ka untied fund sha ki SP kaba la iarap shisha” ong u Conrad haba bynrap ba la dep ruh ba thaw ia ka Committee ba lamkhmat da u SP bad ka Tnad Engineering Wing.
“Ngin nang pynbha shuh shuh ia ki jingtei” ula ong.
Halor ka jingshlei um bad ki jingker kynroh, u Conrad ula ong ba ki jingiarap ki jia haba ki jingeh ki mih hynrei ngi donkam “Ym tang shispah hynrei da ki hajar klur”.
Ka Sorkar, u bynrap, ka ialeh ban pynduna ia ki jingktah bad ai jingiada ia ki iing ba shah ktah, haba kdew ia ka jingther u slap ba jur bad ka jingkylla jong ka suinbneng.
