Shillong, Naiwieng 4: Ka Sorkar Jylla kala mang T.45 Klur ban shna pynbha ia ki surok kiba kongsan hapoh Shillong, ban mih bujli noh ha ka jaka jong ki Smart Road Project.
Ia kane la pyntip da u Symbud Myntri Rangbah uba khmih ia ka tnad Transport u Bah Sniawbhalang Dhar hynne ka sngi Baar.
Ia ka kam la khmih lynti ba dei ban pyndep hapoh ka samoi treikam jong u snem, da ka jingthmu ban pynbha ia ki jingtei ha sor, la ong u Bah Dhar haba iakren bad ki nongthoh khubor.
U Symbud Myntri Rangbah ula batai ia ki sienjam ban pynbha ia ka leit ka wan jong ki paidbah da kaba pynleit jingmjut ha kaban pynduna ia ka jingdheng kali.
U Bah Dhar ula kubur ruh ia ka jingeh kaba mih na ka jingdheng kali bad ula ong ba dei namar kane, ka sorkar kan tei ia ki Parking Lot ne jaka pynieng kali ban shimkhia ia katei ka mat.
Ula pyntip ruh ba ka sorkar ka don ia ka jingthmu ban pynkynriah ia ki ophis treikam sha ka New Shillong Township.
“Kumta hapoh jong ka 5-6 snem, ka New Township kadei ban don ha ka lynti kaba long ryntih bad kiba bun ki ophis kiba rim un sa pynkynriah noh bad kumta ka jingdheng kali kan sa kham duna noh (ha nongbah Shillong barim)” ong u Bah Dhar.
Ia mynta shipor, la sorkar ka dang wad ia ki lad ki lynti ban pyntreikam ia ka One Way Traffic System da kaba iasyllok bad ki rangbah shnong.
Nalor kane, u Symbud Myntri Rangbah ula kubur ruh ban pynbeit ia ka jingdheng kali kadei kaba kynthup ia kiba bun ki tnad kynthup naduh ka tnad Transport, Kam Pohiing, Pulit, bor pyniaid district bad ula pynthikna ba ka sorkar ka dang trei ha kaban shimkhia ia kane ka jingtynjuh.
