Shillong, Nailur 15: Ka Sorkar Jylla kala mang pisa haduh T. 4.42 klur ban maramot ia ka surok na Garobadha sha Dalu kaba iaid lyngba ka Ampati Zikzak-Mahendraganj bad Purakhasia watla ka jingtyrwa kala iaid sha ka Sorkar Pdeng ban pynkylla ia kane ka surok sha ka National Highway.
“Ngi la shimkhia bha ia kane ka surok. Ta ka daw, la mang tyngka T. 4.42 klur na ka pla pisa ka Sorkar bad kan sa nang beit biang sa T. 5.29 klur ban maramot ia ki kam kiba heh ha kane ka surok ba kongsan bha” ong u Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong hapoh ka Iingdorbar.
Haba jubab ia ka jingkylli bala wanrah da u MLA ka Salmanpara Winnerson D Sangma, u Bah Prestone ula pyntip ruh ba ka Sorkar kala phah ia ka jingtyrwa sha ka Sorkar India ba kan pynkylla noh ia kane ka surok sha ka National Highway namar ka dei ka surok ba kongsan tam ha ki jaka them ka thain.
Ka jinglut jingsep jong kane ka project ba 98 km ka kot haduh T. 250 klur bad bad la dep ban pyntrei ia ka ha u snem 2018. U ong ba ka jingiateh bad u contractor ban sumar ia kane ka surok kala kut noh ha u snemm2019.
U Bah Prestone u pyntip ba ka daw jong ka jingjulor kane ka surok ka dei namar ka jingiaid jong ki trok kit maw ban khaii sha Bangladesh.
U Winnerson ula pynpaw ia ka jingsngewkhia halor ka jingbym don ka weighbridge ban tehalakam ia ki trok ba kit palat pud bad ula kylli ba kumno ka Sorkar ka khmih ia kane ka jingiaid ki trok kit palat pud, ia kaba u Symbud Myntri Rangbah ula pynpaw ba u donkam ia ka notice namar ba um don satia ia ki jingtip halor kane.
