Shillong, Rymphang 19 : U Myntri Rangbah ka Jylla Conrad K Sangma ha ka sngi Nyngkong, ula pyntip ba ka Sorkar kala man T.344 klur ban iada ia ki khlaw (catchment area) hajan jong ki artylli ki wah-ka Wah Umiew ha East Khasi Hills bad ka wah Ganol ha Ri-lum Garo.
Haba jubab hapoh Iingdorbar, u Conrad ula ong ba ia kine ki project bala bei tyngka nabar, la sdang pyntreikam dang ha ka taiew bala lah.
“Kane kan dei ka sienjam kaba khraw bha ha kaban iada ia ki khlaw ba marjan ka Wah Umiem bad ka wah Ganol” ula ong.
U Myntri Rangbah ula pyntip ruh ba ka Sorkar Meghalaya ka dei kawei na ki Sorkar ba nyngkong eh ban wanrah ia ka State Water Policy bad ki don ruh shibun ki project ban iada ia ki tyllong um hapoh ka Jylla.
“Ngi dei kawei na ki katto katne ki Jylla ban iatreilang bha bad ka North Eastern Space Application Centre (NESAC) bad ngi lah dep shna map haduh 50,000 tylli ki shyngiar” ula ong.
Ula pyntip ruh ba ka Sorkar kala nang pynkheh mynta ban shna haduh 400-500 tylli ki pukri um (reservoir) ban ioh pyllang ia ka um.
U Myntri Rangbah ula ong ba ka Sorkar kala shimkhia ia ki kam ban tyngkai ia ka um hynrei kam long kaba suk namar ka jingeh kaba mih na ka jingkylla ka suinbneng.
U Nongialam ka Liang Pyrshah Bah Ronnie V Lyngdoh ula kyntu ia ka Sorkar Jylla ban iada ia ki khlaw jong ka wah Umiew.
U ong ba ka Wah Umiew kala sdang rngad namar khyndiat eh la leh ha kaban iada ia ki khlaw ki btap ka thain bala jur palat ka jingiapomdieng.
Haba pynpaw ia kajuh ka jingsngewkhia, u MLA ka UDP na Mawsynram Bah Olan Sing Suin ula ai jingmut ia ka jingdonkam ba ka Sorkar ban iada bad pynneh pynsah ia baroh ki tyllong um naduh kiba don ha ki shnong ki thaw.
Shuwa kane, u Myntri ka Tnad PHE Marcuise N Marak ula ong ba kiba bun ki tyllong um bala pyndon kam ban ring kor um sha ki Iing ki sem hapoh ka Jal Jeevan Mission ki dei kiba tan na ki wah bad na khyndew.
“Khnang ban lah pynduna ia ka jingshaniah ia ka jingioh ym na wah Umiew ha Mawphlang kaba dei ka tyllong um jong ka Greater Shillong Water Supply Scheme, la tyrwa b aka tyllong um ban pynbiang ia ka New Shillong Township kan dei ka wah Umkhen” ula ong
