Shillong, Nailur 25: Ka Research and Development Committee jong ka Khasi Hills Autonomous District Council (KHADC), kala rai ban mang ia ka song pisa ba T. 50 lak ban phah wadbniah ha ki stad wadbniah ia ka riti dustur tynrai u Khasi haba buhpor ruh ba kane ka jingwad bniah kan long hapoh ka saw bnai.
Kane ka rai kala mih na ka jingialang ba nyngkong eh jong ka Committee ba long hynne ka sngi Nyngkong hapoh ka jing pyniaid u Chairman Bah Carnes Sohshang, uba dei ruh u Executive Committee ka Tnad Pule Puthi.
Kane ka jingialang kaba la wan iashimbynta da 7 ngut ki Dkhot, kala rai ruh ban pynmih noh ia ka jingpynbna paidbah, kaba khot ba wer ia ki stad wad bniah kynthup ki scholar ne researcher ba kin pynlong ia ki jingwadbniah halor ki mat bapher bapher kiba iadei bad ka jinglong tynrai u Khasi.
“Ka jingwad bniah kan long halor ka niam ka rukom u Khasi, ka jingkyntiew kurim, ka ktien ka thylliej, ka jingmih jong ki Kur bad ka Jait, ka kolshor, ka rukom synshar tynrai ki khlieh nongsynshar, ka jinghiar dor ka akor ka burom ha kane ka pateng kaba mynta, ka jingngeit beij, ka jingbat ia ka khyndew ka shyiap, ki ïew tynrai kiba shisien shi taiew, ki tiar tem tiar put tynrai kynthup iaka jingrwai tynrai u Khasi, ki jaka kiba don iaka histori bad ki mawbynna, ka jingioh kaba hiar pateng, ki kam thaiñ kti, ka rukom bam rukom dih ka jaidbynriew, ka rukom ai jingsumar tynrai, ka histori shaphang ka jingim bad ka jingnoh synniang u Rev JJM Nichols Roys bam kwai ha dwar u Blei, ki Syiem kiba la ialeh ban pynioh iaka jinglaitluid ia ka jaidbynriew” la ong u Bah Carness.
Ula ong, ba la rai ba yn pyrshang ban pyndep ia kitei ki jingwad bniah hapoh 4 bnai bad ka jingsiew ia ka bai wad bniah ka long T.1 Lak haduh ban da dep bad yn ai ruh T.10,000 kum ka Contingency.
U Chairman ula ong, ba ka Committee kan sa pynmih iaka jingpynbna paidbah ha ki lad pathai khubor ban khot ban wer ia ki nongleh Research bad yn sa khmih bniah ia kine ki jingtyrwa jong ki nongleh Reasearch ia ki mat kaba ki mut ban wad bniah.
Ula ong ba na ka bynta kane ka kam, ka KHADC kala mang T.50 Lak ban pynlut ha ka jingleh Research halor kitei ki mat bapher.
U Dkhot ka Committee u Dr DRL Nonglait ula ong, ka KHADC kala shim ia kane ka sienjam namar ba ki nongwad bniah ki ju wan kylli na ka Council ia ki kaiphod bapher bapher bad ka Council ka don tang malu mala eh ia ki jingtip.
Ula ong, ba kane ka jingduna ki jingtip kam dei tang haka Council hynrei wat ha ka State Central Library, ki University bad ki jingthoh kiba iadei bad ka riti ka dustur, ka niam ka rukom ka jaidbynriew, ki histori jong ki hima bad ka kolshor kadei kaba la thoh da ki nongsynshar kiba mynshwa kiba hap ban shaniah ha ki kaiphod jong ki nongwei.
“Kane ka jingleh ka Council mynta ka long, ba ngi hap ban wad hi na ka bynta la ka jong ka jaidbynriew bad kane kadei tang ka jingsdang bad ka Council kala sdang shwa iaka jingwad bniah kiba rit bad nangne kan sa nang iai bteng ka jingwad bniah” ong u Dr Nonglait.
