Shillong, Jymmang 29 : Ka District Magistrate ka East Khasi Hills Kong RM Kurbah, kala pynmih ia ka jingmana ban pyndonkam ia ki tiar plastic bba pyndonkam tang shisien pyndonkam bad ki pla plastic kiba duna ia ka jingrben ba 120 microns hapoh ka District.
Kane ka jingmana kan treikam naduh ka 1 tarik Jylliew haba pyntip ruh ba kane ka dei kat kum ka hukum jong ka Iingkashari Meghalaya High Court, kaba la phah sha baroh ki District, ba kin shim ia ki lad pynshitom kiba tyngeh pyrshah ia ka jingdie bad pyndonkam ia ki plastic kiba ki jingrben ki ba duna ia kaba la buh kyndon.
Ka Magistrate kala mana ia ka jingpynmih/jingkhaii/jingdie bad jingpynkam ia ki pla plastic kiba duna ia ka 120 micron ka jingrben bad ki tiar plastic kiba kynthup :-
- a) Ki tiar plastik ba pyndait ha ki jingkhlong shkor, ki balloon, ki mit mit, ice cream, ki lama plastik, ki Thermocol ban wah pynitynnat.
- b) Ki pliang, pela, ki tiar bam kum ki proh, shamoit, tari, tiar kjit jingdih, ki tray, jingking sha, ki tiar song synduk jingbam thiang, ki card khot sngewbha, ki banner plastik ne PVC kiba duna ia ka 100 micron.
- c) Ki plastik ba pyndonkam tang shisien kiba la kam ba ki dei kiba lah ban pyut bad kiba lah ban pra tangba ki ba khlem ioh ia ka jingpynthikna na ka Central Pollution Control Board (CPCB).
Kino kino kiba pynkhein ia katei ka hukum kin ngat ha ka jingpynshitom hapoh ka kyndon 18 jong ka Public Waste Management Rules kaba la pynthymmai kaba 6 tarik Naitung, 2022 kaba la pynlong ain hapoh ka Environment (Protection) Act, 1986.
