Shillong, Rymphang 22 : Ka Chairperson jongka All India Trinamool Congress (AITC) ka Mamata Banerjee hynne ka sngi Balang, kala ong ba ka seng BJP bad Congress kin ym lah ban long paralok bad ki paidbah jong ka jylla Meghalaya.
Haba ai jingkren haka rynsan ialap elekshon ha Rajabala, ka Mamata Banerjee kala ong, “Ka BJP bad Congress kiba na Delhi kin ym lah ban long ki paralok ki jong phi. Kila don ha ka bor la bun snem hynrei kim shym la lah wat ban shna tang ia ki surok ha Meghalaya”.
“Ka Trinamool Congress kadei ka seng kaba trei na ka bynta ki paidbah kumta dei ban pynkylla noh ia kane ka sorkar kaba la don haka bor ha kine ki 5 snem kiba la dep.Kane ka sorkar kam shym la leh eiei, ym don Medical College, ym don ia ki surok kiba paka, ym shim la kyntiew iaki jaka ai jingsumar bad kam shim la don kino kino ki kampynroi hynrei tang ki jyrsieh bamsap” kala bynrap.
Ka Mamata kala ther iaka seng Congress kabym shym lah ha kaban pyndep iala ka kamram kum ka seng kaba don ha ka Liang Pyrshah.
“Ka Congress ka pan ia ka vote na ki paidbah hynrei shaei ka buh iala ka hok jong ka jingiatiplem? Nga lah don haka seng Congress hynrei kila beh noh ia nga na ka seng. Ngi iakhun iaka thma pyrshah iaka BJP hynrei man la ka sngi ka BJP ka wan tied ia ka jingkhang ka jong ngi da ki Enforcement Department bad CBI” ong ka Nongialam ka AITC.
Kala kyntu ia ki paidbah ka jylla ba kin jied ia u nongialam uba napoh ka jylla hi ym da kiba nabar ka jylla.
“Kiba nabar ki kwah ban synshar hangne ban thombor ia phi lyngba ka NRC, CAA, kuli bad ki kam jyrsieh, wat ym ailad ia kane. Ia ka Meghalaya dei ban pyniaid hi da ka Meghalaya ym da ka Guwahati ne Delhi. Ngin ruh ngin ym pyniaid ia kane ka jylla na Bengal. Ngi dei ki paralok ki jong phi bad ngin iarap ia phi ia kaei kaei kaba phi donkam” ong ka Mamata.
Kane ka Nongialam ka AITC kala ong “Ka jinglong tynrai ka jong ngi, ka long ba ngi dei ki briew bad ngi ieid para briew. Ngi burom ia baroh ki jait niam. Nga ngeit ba ka kamram kaba hakhmat eh ka jong nga kadei ban don ryngkat bad ki paidbah. Kam don kano kano ka niam kaban heh ban ia ka niam jong ki para briew bad ban ieng ryngkat bad ki paidbah”.
Ka Mamata kala kyntu ia ki paidbah ba kin pynjop iaka TMC ha Meghalaya namar kan dei kane ka seng kaban weng iaka seng BJP naka jingsynshar ha Delhi ha kine ki sngi ban wan, kumta ki paidbah ki dei ba njied iaka TMC khnang ba kan lah ban pynrem iaka BJP hakaelekshon kaba nlong ha u 2024.
Katba u National General Secretary ka AITC u Abhishek Banerjee ula pynthikna ba lada ka TMCkawan haka bor kan pyntreikam iaka WE Card scheme hapoh shi bnai ba ka wan ha ka bor ha kaba baroh ki kynthei ha man la ki longIing kin ioh T.1,000 shi bnai ha ka Bank Account ki jongki.
