Shillong, Iaiong 21: Ka ophis Sub-Divisional Office Pynursla Civil Sub-Division ka kyntu ia baroh ki nongleit nongwan kiba iaid naka surokbah Lyngkyrdem-Laitlyngkot ba kin long kiba husiar.
Kane ka jingkyntu kadei namar ba ka surokbah Lyngkyrdem-Laitlyngkot ka dang don hapdeng ka jingpyntrei bad kane ka lah ban wanrah ia ka jingma na ka jinghap khyndew/maw khamtam na ka jingwan jong ka aiom lyiur.
Halor kane, ka ophis ka kyntu ia baroh ki nongleit nongwan kiba iaid na kane ka surok ba kin long kiba husiar bad kidei ban bud iaki jingbthah.
Ki paidbah kidei ban kiar na ka leit ka wan kaba ym da donkam than ha ka por bajur u slap ne hadien ka jingjur slap, ban bud ryntih ia ki traffic signage bad ki jingbthah ba la pynmih da ki briew bala buh khnang ban pyniaid kali jong ka Kompani shna surok, ia ka kali dei ban da niah husiar bad adkar, khamtam ha ki jaka ba sharing bad jaka ba pyntrei ia ka surok, lada don kino kino ki dak jingtwa/jinghap khyndew bad jot ka surok dei ban pyntip mardor sha ka ophis u Block Development Officer, Pynursla C&RD Block, Pynursla lane Sub-Divisional Officer (C), Pynursla bad bud ryntih ia ki jingpynbna paidbah kiba shaniah bad bala pynmih da ka sorkar na ka bynta kino kino ki jingpyntip ba donkam lane lada don kano kano ka jingkhang/jingpyniaid lait ia ka surok.
