Shillong, K’lyngkot 10 : U Myntri ka tnad Pule Puthi Rakkam A Sangma, ula maham ban leh da kaba tyngeh ia kito ki briew kiba donkti ban thung beain ia ki ‘Nonghikai proxy’ (ki nonghikai ba buh da ki briew lajong ban leit hikai ha jaka jong ki) ha ki skul Lower Primary ka Sorkar kiba don hapoh ka Jylla.
Haba iakren bad ki nongthoh khubor hynne ka sngi Balang, u Rakkam ula pyntip ba u ju iohsngew ba ki don bun ki skul Lower Primary ka Sorkar kaba don ia ka jingthung nonghikai proxy ha kaba ki nonghikai kiba lathung da ka Sorkar kila thung pat da kiwei ki briew ban trei na ka bynta jong ki.
“Ngin ym shah ia kum kane ba kan jia. Ngin pynthikna ba ki Ophisar jong ngi kin leit jurip bad lum jingtip ia ki skul bad ngin pynthikna ba man ki nonghikai ki trei iala ka kam namar lada ki kheinsting iala ka kamram, phi pynjot ia ka lawei jong ki Khynnah” ula ong.
“Namar kata, nga kyrpad ia ki nonghikai hapoh ka Jylla ba to ngin iakit lem ia ka jingbahkhlieh da kaba ai ka jinghikai kaba bha tam ia ki khun jong ngi. Haba kut hi, ka lawei jong ka Meghalaya ka dei kaban rai ym da kaei kaei, hynrei da ka jinglong jingman jong ka pule ka dangle. Lada phi ai ka jinghikai kaba bha, kiba mih ruh kin dei kiba bha. Ngin pynthikna ba baroh kine ki jingle thok kim dei ban jia shuh bad man ki nonghikai ki hap ban don ka jingsngew bahkhlieh bad don jingsngew kum la ka jong ha kaban shakri ia ki paidbah ka Jylla” ula bynrap.
Haba kylli, u Myntri ula ong “Haba iadei bad ki nonghikai proxy, lada ka tnad ka ioh pdiang ia kano kano ka jingujor ha ryngkat ki sakhi, nga sngew ba ka Sorkar ka dei ban shim ia ki sienjam ba dei ban shim”.
U Myntri ula kyntu ruh ia ki Nonghikai kiba leh ia kine ki jait kam, ba kin shu iehnohkam bad shim VRS noh.
Kat kum ka jingong jong u, ka jingthung ia ki nonghikai proxy ka dei kaba jia ha manla ki district jong ka Jylla.
U pyntip ba shen un s alum ia ka jingialang ban iakren ia kane ka kam bad kyntu ia ki Deputy Commissioner bad ki District Officer ka Tnad ba kin pynthikna ba man ki nonghikai ki dei ban leit sha skul ryngkat ka jingbahkhlieh bala tynrah ha ki.
