Nongstoiñ, Rymphang 10: U Bhupendra S Chaudhary, IAS General Observer bad Dr Sunil N Ranote, IRS Expenditure Observer ka West Khasi Hills District, hynne ka sngi thohdieng, ki la maham ia baroh ki kyrtong bad ki Political Party ba kim dei ban lehtam ha kane ka elekshon MLA-2023 ban long la 27 tarik Rymphang haba ong ba ka Ain kan nym don jingmap satia ia ki.
Kine ki Nongpeit pyrman ka Election Commission ka India (ECI) kila buh ia kane ka jingmaham ia ka jingialang bad baroh ki nongmihkhmat jong ki Political Party jong ki lai tylli ki constituency ka District, ha ka jingdon ryngkat u District Election Officer bah Garod LSN Dykes, ki RO, ARO, AERO bad kiwei kiwei ha Conference Hall DC’s office, Nongstoiñ.
Kane ka jingialang ka la ïatai sani bha shaphang ki aiñ bad ki kyndon ha kaba ïadei bad ki jingpynlut pynsep da ki kyrtong ha ka por election.
U bah H.K Thabah u nodal officer ka District Election Monitoring Committee bad RO 34-Mawshynrut (ST) Assembly Constituency lyngba ka power point presentation, u la batai bniah ïa bun jait ki jingpynlut pynsep la ka long ki jingpynlut ha ki kali, ki shuki, ki tiar pynsawa bad kiwei kiwei ïa ka ban pyndonkam da ki kyrtong ha ki campaign, ki rally, ki meeting bad kumta ter ter.
Ka kong D.Kharshiïing RO 33-Rambrai Jyrngam ka la pynkynmaw ha kane ka jingïalang ïa ki jingpynlut pynsep beaiñ, ha kaba ka la mana ba ka aiñ kan ym map ïa kino kino ki political party ne kyrtong lada lap bad ban pyshitom da kaba daiñ kuna ne set phatok.
Kum ka jingïakynduh lang u Expenditure bad General Observer, ki la kyntu ïa baroh ki political party, ba kin bud pyrkhing ïa ki aiñ bad ki kyndon jong ka Election ka Model Code of Conduct (MCC), da kaba kiar na kino kino ki jingpynwit bad pynthut.
